സുന്നി വിദ്യാഭ്യാസ ബോർഡ് മദ്‌റസകൾ ഏപ്രിൽ ഒന്പതിന് തുറക്കും

കോഴിക്കോട് | സമസ്ത കേരള സുന്നി വിദ്യാഭ്യാസ ബോർഡിന്റെ അംഗീകാരമുള്ള മുഴുവൻ മദ്‌റസകളും ഈ വർഷം റമസാൻ അവധി കഴിഞ്ഞ് ഏപ്രിൽ ഒന്പതിന് തുറന്നു പ്രവർത്തിക്കുമെന്ന് ബോർഡ് ഓഫീസിൽ നിന്ന് അറിയിച്ചു.
പുതിയ അധ്യയന വർഷാരംഭത്തിന്റെ ഭാഗമായി എല്ലാ മദ്‌റസകളും അലങ്കരിക്കുകയും രക്ഷാകർത്താക്കളെയും വിദ്യാർഥികളെയും ഉൾപ്പെടുത്തി പ്രവേശനോത്സവം സംഘടിപ്പിക്കുകയും വേണം.

മദ്‌റസകളിലേക്കുള്ള മുഴുവൻ പാഠപുസ്തകങ്ങളും ബുക്ക് ഡിപ്പോയിൽ തയ്യാറായിട്ടുണ്ട്. മുഅല്ലിംകളുടെ സൗകര്യാർഥം ഏപ്രിൽ നാല് മുതൽ ഓൺലൈൻ ബുക്കിംഗിന് സംവിധാനമേർപ്പെടുത്തിയിട്ടുണ്ട്. www.samastha.in എന്ന വെബ്‌സൈറ്റിൽ Madrasa Books Online Token ക്ലിക്ക് ചെയ്ത് സൗകര്യമുള്ള ദിവസം, സമയം സെലക്റ്റ് ചെയ്ത് പേര്, മൊബൈൽ നമ്പർ, സ്ഥലം, ജില്ല എന്നിവ എന്റർ ചെയ്ത് രജിസ്റ്റർ ചെയ്യാം. ഏപ്രിൽ നാല് മുതൽ മെയ് 19 വരെയുള്ള ദിവസങ്ങളിൽ വൈകിട്ട് അഞ്ച് വരെ മുൻകൂട്ടി ബുക്ക് ചെയ്തവർക്ക് മാത്രമെ പാഠപുസ്തകങ്ങൾ വിതരണം ചെയ്യൂ. കൂടുതൽ വിവരങ്ങൾക്ക് 7594002840 നമ്പറിൽ ബന്ധപ്പെടാം. കോഴിക്കോട് സമസ്ത സെന്റർ ബുക്ക് ഡിപ്പോ, മലപ്പുറം ടെക്‌നോ വേൾഡ് എന്നിവിടങ്ങളിൽ പുസ്തക വിതരണം ഉണ്ടായിരിക്കും. ഏപ്രിൽ 20ന് മുമ്പ് സദർ മുഅല്ലിംകൾ പൊതുപരീക്ഷാ ക്ലാസ്സുകളിലെ ഓൺലൈൻ അഡ്മിഷൻ രജിസ്റ്ററിലെ വിദ്യാർഥികളുടെ പേര്, ജനന തീയതി, പിതാവിന്റെ പേര് എന്നിവയിലുള്ള തെറ്റുകൾ തിരുത്തി സേവ് ചെയ്ത് സബ്മിറ്റ് ചെയ്യേണ്ടതാണ്. 20ാം തീയതിക്ക് ശേഷം വരുത്തുന്ന തിരുത്തലുകൾ സർട്ടിഫിക്കറ്റുകളിൽ വരുന്നതല്ല.