ട്രെയിനില്‍വച്ച് കുഞ്ഞിനെ തട്ടിയെടുത്ത തമിഴ്‌നാട്ടുകാരന്‍ പിടിയില്‍

തൃശൂര്‍ | ടെയിനില്‍നിന്ന് ഒഡീഷ സ്വദേശികളുടെ കുഞ്ഞിനെ തട്ടിയെടുത്ത തമിഴ്‌നാട്ടുകാരന്‍ പിടിയില്‍. ഓട്ടോ ഡ്രൈവര്‍മാര്‍ക്കും നാട്ടുകാര്‍ക്കും തോന്നിയ സംശയമാണ് കുഞ്ഞിനെ കണ്ടെത്താന്‍ വഴിയൊരുക്കിയത്.

ട്രെയിനില്‍ ആലുവയിലേക്ക് വരികയായിരുന്ന അതിഥി തൊഴിലാളികളുടെ ഒരു വയസ് പ്രായമുള്ള കുഞ്ഞിനെയാണ് തട്ടിക്കൊണ്ട് പോയത്. അമ്മയ്‌ക്കൊപ്പം ഉറങ്ങിക്കൊണ്ടിരുന്ന കുഞ്ഞിനെ പ്രതി തട്ടിയെടുത്ത് കടന്നു കളയുകയായിരുന്നു. ഒഡീഷ സ്വദേശികളായ മാനസ്- ഹമീസ ദമ്പതികളുടെ ഒരു വയസുള്ള കുഞ്ഞിനെ തട്ടിക്കൊണ്ട് പോയ സംഭവത്തില്‍ ദിണ്ടിഗല്‍ സ്വദേശി വെട്രിവേലിനെ പോലീസ് അറസ്റ്റ് ചെയ്തു.

ഇന്നലെ രാത്രി പന്ത്രണ്ടരയോടെയാണ് സംഭവം. ഒഡീഷയില്‍ നിന്ന് ആലുവയിലേക്കുള്ള ടാറ്റ നഗര്‍ എക്‌സ്പ്രസിലാണ് ദമ്പതികള്‍ വന്നിരുന്നത്. കമ്പാര്‍ട്ട്‌മെന്റില്‍ ആളുകള്‍ കുറവായതിനാല്‍ ഹമീസ കുഞ്ഞിനൊപ്പം സീറ്റില്‍ കിടന്ന് ഉറങ്ങുകയായിരുന്നു. ഈ സമയത്താണ് കുഞ്ഞിനെ വെട്രിവേല്‍ തട്ടിയെടുത്തത്.

തൃശൂര്‍ എത്തിയപ്പോഴാണ് കുട്ടിയെ കാണാതായത് ദമ്പതികള്‍ അറിയുന്നത്. ദമ്പതികള്‍ റെയില്‍വേ പോലീസുമായി ബന്ധപ്പെട്ട് കുഞ്ഞിനായുള്ള അന്വേഷണം ആരംഭിച്ചു. എന്നാല്‍ കുഞ്ഞിനെ എവിടെ വച്ചാണ് കാണാതായതെന്ന് ഉറക്കത്തിലായതിനാല്‍ അറിയാനായിരുന്നില്ല. കുഞ്ഞിന്റെ ചിത്രം കാണിച്ച് തെരച്ചില്‍ പോലീസ് ആരംഭിക്കുകയും ചെയ്തു. ഇതിനിടെയാണ് വാവിട്ട് കരയുന്ന കുഞ്ഞുമായി ഒരു യുവാവിനെ ഒലവക്കോട് കാണുന്നത്. സംശയം തോന്നിയ ഓട്ടോറിക്ഷ ഡ്രൈവര്‍മാരും നാട്ടുകാരും ചേര്‍ന്ന് നടത്തിയ ഇടപെടലാണ് കുഞ്ഞിനെ കണ്ടെത്താന്‍ സഹായിച്ചത്.

കുഞ്ഞ് യുവാവിന്റേതാണോയെന്ന ചോദ്യത്തിന് മദ്യപിച്ച് ലക്കുകെട്ട യുവാവ് ആദ്യം അതേയെന്ന് പറഞ്ഞു. പിന്നാലെ നിങ്ങളുടെ കുഞ്ഞാണെങ്കില്‍ എടുത്തോളൂയെന്നായിരുന്നു വെട്രിവേല്‍ നല്‍കിയ മറുപടി. ഇതോടെ നാട്ടുകാര്‍ യുവാവിനെ തടഞ്ഞുവച്ച് വിവരം പോലീസിനെ അറിയിക്കുകയായിരുന്നു.