10.7 കോടി ദിര്‍ഹത്തിന്റെ നികുതി വെട്ടിപ്പ്; 15 പേര്‍ക്കെതിരെ നടപടി

ദുബൈ| നികുതി വെട്ടിപ്പും കള്ളപ്പണ ഇടപാടും നടത്തിയതിന് 15 പേര്‍ക്കെതിരെ അറസ്റ്റ് വാറണ്ട് പുറപ്പെടുവിച്ചതായി യു എ ഇ അറ്റോര്‍ണി ജനറല്‍ ഡോ ഹമദ് സൈഫ് അല്‍ ശംസി അറിയിച്ചു. അറബ് രാജ്യങ്ങളിലെ 15 പേരാണ് പ്രതികള്‍. ഇവരെ ക്രിമിനല്‍ വിചാരണക്ക് റഫര്‍ ചെയ്യാന്‍ ഉത്തരവിട്ടു. അവരില്‍ ചിലര്‍ കസ്റ്റഡിയിലുണ്ട്. മറ്റു ചിലര്‍ പിടികിട്ടാപ്പുള്ളികളാണ്. വ്യാജരേഖ ചമക്കല്‍, കള്ളപ്പണം വെളുപ്പിക്കല്‍, നികുതി വെട്ടിപ്പ് നടത്തല്‍ തുടങ്ങിയ കുറ്റങ്ങള്‍ ചെയ്തതിന് 12 കമ്പനികളാണ് കുറ്റപത്രത്തില്‍ ഉള്‍പ്പെട്ടിരുന്നത്.

അറ്റോര്‍ണി ജനറലിന്റെ നേരിട്ടുള്ള മേല്‍നോട്ടത്തിലായിരുന്നു അന്വേഷണം. നികുതി വെട്ടിപ്പ് കുറ്റകൃത്യങ്ങള്‍ക്കെതിരെ ഫെഡറല്‍ പ്രോസിക്യൂഷന്‍ നടത്തിയ അന്വേഷണത്തില്‍, സാമ്പത്തിക മന്ത്രാലയം, ചേംബര്‍ ഓഫ് കൊമേഴ്‌സ്, കസ്റ്റംസ് ഡിപ്പാര്‍ട്ട്‌മെന്റ് എന്നിവക്ക് അധികാരമുള്ള ഔദ്യോഗിക രേഖകള്‍ ഇവര്‍ വ്യാജമായി നിര്‍മിച്ചതായി കണ്ടെത്തി. കുറ്റകൃത്യങ്ങള്‍ ചെയ്യാന്‍ അവര്‍ ഒരു ക്രിമിനല്‍ സംഘം രൂപീകരിച്ചതായി തെളിഞ്ഞു. റീഫണ്ട് ചെയ്ത മൂല്യവര്‍ധിത നികുതിയുടെ മൂല്യം നിയമവിരുദ്ധമായി ഈടാക്കാന്‍ അവര്‍ക്ക് സാധിച്ചു.

ക്രിമിനല്‍ ഉദ്ദേശ്യം നടപ്പിലാക്കുന്നതിനായി അവര്‍ പ്രത്യേകം കമ്പനി സ്ഥാപിച്ചു. ഉത്പന്നങ്ങള്‍ അവര്‍ വാങ്ങുകയും നികുതി അടക്കുകയും വിദേശത്തേക്ക് കയറ്റുമതി ചെയ്യുകയുമായിരുന്നു. ഇറക്കുമതിയിലെ മൂല്യവര്‍ധിത നികുതി തുകകള്‍ അവര്‍ സ്വയം ഈടാക്കി. കള്ളപ്പണം വെളുപ്പിക്കലിലൂടെ ഈ കുറ്റകൃത്യങ്ങളില്‍ നിന്ന് ലഭിച്ച അനധികൃത വരുമാനത്തിന്റെ ഉറവിടം മറച്ചുവെക്കാന്‍ അവര്‍ക്ക് കഴിഞ്ഞു. പ്രതികള്‍ ഈടാക്കിയ മൊത്തം തുക 10.7 കോടി ദിര്‍ഹം കവിഞ്ഞു.