ലോകത്തിലെ ആദ്യത്തെ ട്രൈ ഫോൾഡ്‌ സ്‌മാർട്ട്‌ ഫോണുമായി ടെക്‌നോ

ലോകത്തിലെ ആദ്യത്തെ ട്രൈ ഫോൾഡ്‌ സ്‌മാർട്ട്‌ ഫോണിനെ പരിചയപ്പെടുത്തിയിരിക്കുകയാണ്‌ ചൈനീസ്‌ മൊബൈൽ കമ്പനിയായ ടെക്‌നോ. ഐഎഫ്എ ബെർലിനിൽ കഴിഞ്ഞ ദിവസമാണ്‌ ഫോണിന്‍റെ രൂപരേഖയും മറ്റ്‌ സവിശേഷതകളും കമ്പനി പുറത്തുവിട്ടത്‌.

ടെക്‌നോ ഫാൻ്റം അൾട്ടിമേറ്റ് 2 എന്നാണ്‌ മോഡലിന്‍റെ പേര്‌. പേര് സൂചിപ്പിക്കുന്നത് പോലെ, ഡ്യുവൽ-ഹിഞ്ച് മെക്കാനിസം ഉപയോഗിച്ച് മൂന്നായി മടക്കാവുന്ന സ്‌ക്രീനാണ്‌ ഫോണിന്‍റെ പ്രത്യേകത. ഫെബ്രുവരിയിൽ ബാഴ്‌സലോണയിൽ നടന്ന മൊബൈൽ വേൾഡ് കോൺഗ്രസിൽ (എംഡബ്ല്യുസി) റോളബിൾ സ്മാർട്ട്‌ഫോൺ ആശയവും ടെക്‌നോ അവതരിപ്പിച്ചിരുന്നു. ഫാൻ്റം അൾട്ടിമേറ്റ്‌ എന്ന ആ മോഡലിന്‍റെ പിൻഗാമിയായാണ് ട്രിപ്പിൾ ഫോൾഡബിൾ ഫാന്‍റം അൾട്ടിമേറ്റ്‌ രണ്ടിനെ അവതരിപ്പിച്ചിരിക്കുന്നത്‌. വലിയ 10 ഇഞ്ച് ഡിസ്‌പ്ലേയോടെയാണ്‌ ഫാന്‍റം അൾട്ടിമേറ്റ്‌ 2 എത്തുക. എന്നാൽ ഫോൺ എന്ന്‌ വിപണിയിലെത്തും എന്ന വിവരം പുറത്തുവിട്ടിട്ടില്ല.

പ്രത്യേകതകൾ

6.48 ഇഞ്ച് കവർ ഡിസ്‌പ്ലേയും 1,620 x 2,880 പിക്‌സൽ റെസല്യൂഷനുമുള്ള 10 ഇഞ്ച് എൽടിപിഒ ഒഎൽഇഡി ഇൻ്റർ സ്‌ക്രീനാണ്‌ ട്രിപ്പിൾ ഫോൾഡബിൾ ഫോണിൽ സജ്ജീകരിച്ചിരിക്കുന്നത്‌. 4:3 ആസ്‌പെക്‌ട്‌റ്റ്‌ റേഷ്യോ ആണ്‌ ഈ ഡിസ്‌പ്ലേയുടെ സവിശേഷത. ടച്ച് ആൻഡ് ഡിസ്‌പ്ലേ ഡ്രൈവർ ഇൻ്റഗ്രേഷൻ (ടിഡിഡിഐ) സാങ്കേതികവിദ്യ പ്രയോജനപ്പെടുത്തുന്ന വിപണിയിലെ ആദ്യത്തെ മടക്കാവുന്ന ഉപകരണമാണിതെന്നും കമ്പനി അവകാശപ്പെടുന്നു.

മൂന്ന്‌ തവണ മടക്കാമെങ്കിലും ഫോണിന്‍റെ കനം കൂട്ടിയിട്ടില്ല. ഗൂഗിൾ പിക്‌സൽ 9 പ്രോ ഫോൾഡ് (10.5 എംഎം) പോലുള്ള മറ്റ് ബുക്ക്-സ്റ്റൈൽ ഫോൾഡബിൾ സ്‌മാർട്ട്‌ഫോണുകൾക്ക് സമാനമായി 11 എംഎം കനത്തിലാണ്‌ ഡിസൈൻ. സാംസങ് ഗാലക്‌സി ഇസഡ് ഫോൾഡ് 6ന്‌ 12.1 എംഎം കനം വരുന്നുണ്ട്‌.