സംസ്ഥാനത്ത് താപനില വര്‍ധിക്കുന്നു; പാലക്കാടിന് സമാനമായ ചൂട് തൃശൂരും

കോഴിക്കോട്  |സംസ്ഥാനത്ത് പകല്‍ താപനില വര്‍ധിക്കുന്നു. കൊല്ലം, ആലപ്പുഴ, കോട്ടയം, തൃശൂര്‍, കോഴിക്കോട്, കണ്ണൂര്‍ ജില്ലകളില്‍ പകല്‍ താപനില ഇനിയും ഉയരാന്‍ സാധ്യതയെന്ന് കേന്ദ്ര കാലാവസ്ഥ വിഭാഗം മുന്നറിയിപ്പ് നല്‍കി.

ശനിയാഴ്ച തൃശൂര്‍ വെള്ളാനിക്കരയില്‍ ഉച്ചതിരിഞ്ഞ് താപനില 38.6 ഡിഗ്രി സെല്‍ഷ്യസായിരുന്നു. വൈകിട്ട് നാലോടെ ഇത് 34 ഡിഗ്രിയിലെത്തി. പാലക്കാട് അനുഭവപ്പെടുന്ന ചൂടിന് സമാനമായ ചൂടാണ് തൃശൂരും ഇപ്പോഴുള്ളത്. രാത്രി താപനില ശരാശരി 25 ഡിഗ്രിയിലേറെയാണെന്ന് കേന്ദ്ര കാലാവസ്ഥ വിദഗ്ധര്‍ പറയുന്നു.

കൊല്ലം പുനലൂരില്‍ ശനിയാഴ്ച 38 ഡിഗ്രി സെല്‍ഷ്യസ് രേഖപ്പെടുത്തിയപ്പോള്‍ പാലക്കാട് 37.6 ഡിഗ്രി സെല്‍ഷ്യസാണ് രേഖപ്പെടുത്തിയത്. മുന്നറിയിപ്പ് നല്‍കിയിരിക്കുന്ന ജില്ലകളില്‍ പകല്‍ താപനില 36 ഡിഗ്രി സെല്‍ഷ്യസ് കടന്നേക്കുമെന്നും മുന്നറിയിപ്പുണ്ട്.