പേരാമ്പ്രയില്‍ കനാലില്‍ കാണാതായ യുവാവിന്റെ മൃതദേഹം കണ്ടെത്തി

കോഴിക്കോട് | പേരാമ്പ്രയില്‍ കനാലില്‍ കാണാതായ 24കാരന്റെ മൃതദേഹം കണ്ടെത്തി. ആശാരിമുക്ക് സ്വദേശി യദുവിന്റെ മൃതദേഹം ശനിയാഴ്ച രാവിലെയാണ് കണ്ടെടുത്തത്. അഗ്‌നിരക്ഷാസേനയും മുങ്ങല്‍വിദഗ്ധരും മണിക്കൂറുകളോളം നടത്തിയ തിരച്ചിലിനൊടുവിലാണ് യദുവിന്റെ മൃതദേഹം കനാലില്‍ നിന്നും കണ്ടെത്തിയത്. ഇന്നലെ രാത്രി പത്തുമണിയോടെയാണ് യദു കനാലില്‍ ചാടിയത്.

മറുകരയിലുള്ള സുഹൃത്തുക്കളുടെ അരികിലേക്ക് നീന്തിവരാമെന്ന് പറഞ്ഞാണ് യുവാവ് കനാലില്‍ ചാടിയത്. തുടര്‍ന്ന് യദുവിനെ കാണാതാവുകയായിരുന്നു. ഇന്നലെ രാത്രി തന്നെ യുവാവിനെ കണ്ടെത്താനായി തിരച്ചില്‍ നടത്തിയെങ്കിലും ആളെ കണ്ടെത്താനായില്ല. ഇന്ന് രാവിലെ വീണ്ടും തിരച്ചില്‍ പുനരാരംഭിക്കുകയും 11 മണിയോടെ മൃതദേഹം കണ്ടെത്തുകയുമായിരുന്നു.