താമരശേരി ചുരം ഇറങ്ങുന്നതിനിടെ ബസിന്റെ ബ്രേക്ക് തകരാറിലായി; സംരക്ഷണഭിത്തിയില്‍ ഇടിച്ചു, വന്‍ അപകടം ഒഴിവായി

കോഴിക്കോട്| താമരശ്ശേരി ചുരം ഇറങ്ങുന്നതിനിടെ സ്വകാര്യ ബസിന്റെ ബ്രേക്ക് തകരാറിലായി. തലനാരിഴയ്ക്ക് വന്‍ അപകടം ഒഴിവായി. ചുരം ഇറങ്ങുന്നതിനിടെ ആറാം വളവില്‍ വെച്ച് ബസിന്റെ ബ്രേക്ക് തകരാറിലായതിനെ തുടര്‍ന്ന് സംരക്ഷണഭിത്തിയിലേക്ക് ഇടിച്ചുകയറുകയായിരുന്നു. ബസിന്റെ ഒരു ഭാഗത്തെ മുന്‍ ടയറുകള്‍ സംരക്ഷണഭിത്തിയും കടന്ന് പുറത്തേക്ക് നിന്നിരുന്നു. സംരക്ഷണ ഭിത്തിയില്‍ ഇടിച്ച് ബസ് കൊക്കയിലേക്ക് മറിയാതെ നിന്നതിനാലാണ് യാത്രക്കാര്‍ രക്ഷപ്പെട്ടത്.

വയനാട്ടില്‍ നിന്ന് കോഴിക്കോടേക്ക് പോവുകയായിരുന്ന ബസാണ് അപകടത്തില്‍പ്പെട്ടത്. വളവ് തിരിയുന്നതിനിടെയാണ് അപകടം. സംഭവത്തെ തുടര്‍ന്ന് ചുരത്തില്‍ ഗതാഗത തടസം നേരിടുകയാണ്. ടിപ്പര്‍ ലോറിയില്‍ കെട്ടി ബസ് പിന്നോട്ട് വലിച്ച് നീക്കിയിട്ടുണ്ട്. ഹൈവെ പോലീസും ചുരം സംരക്ഷണ സമിതി പ്രവര്‍ത്തകരും ഗതാഗതം നിയന്ത്രിക്കാന്‍ സ്ഥലത്തുണ്ട്.