Kerala
സംസ്ഥാനത്ത് കൊവിഡ് മോണിറ്ററിംഗ് സെല് വീണ്ടും പ്രവര്ത്തനം തുടങ്ങി
വിമാനത്താവളങ്ങളിലും സീപോര്ട്ടിലും നിരീക്ഷണം ശക്തമാക്കും
![](https://assets.sirajlive.com/2022/01/veena-george-covid-897x538.jpg)
തിരുവനന്തപുരം | വിവിധ രാജ്യങ്ങളില് കൊവിഡ് വര്ധിച്ചു വരുന്ന സാഹചര്യത്തില് സ്റ്റേറ്റ് കൊവിഡ് മോണിറ്ററിംഗ് സെല്ലിന്റെ പ്രവര്ത്തനം പുനരാരംഭിച്ചുവെന്ന് ആരോഗ്യമന്ത്രി വീണ ജോര്ജ്. ജില്ലകളുടെ അവലോകന യോഗത്തില് സംസാരിക്കുകയായിരുന്നു മന്ത്രി. ആശുപത്രി ഉപയോഗം, രോഗനിര്ണയ നിരക്ക്, മരണ നിരക്ക് എന്നിവ നിരീക്ഷിക്കുകയും അവബോധം ശക്തിപ്പെടുത്തുകയുമാണ് പ്രധാന ലക്ഷ്യം
വിമാനത്താവളങ്ങളിലും സീപോര്ട്ടിലും നിരീക്ഷണം ശക്തമാക്കും. കേന്ദ്ര നിര്ദേശ പ്രകാരം വിദേശത്ത് നിന്നും വരുന്ന രണ്ട് ശതമാനം പേരുടെ സാമ്പിളുകള് പരിശോധിക്കുന്നതാണ്. ജില്ലകള് സ്വീകരിച്ചതും സ്വീകരിക്കേണ്ടതുമായ പ്രവര്ത്തനങ്ങള് യോഗം ചര്ച്ച ചെയ്തു. സംസ്ഥാനത്ത് നിലവില് കോവിഡ് കേസുകള് വളരെ കുറവാണ്.രണ്ടാഴ്ചയിലെ കണക്കെടുത്താല് പ്രതിദിന കേസുകള് 100ന് താഴെ മാത്രമാണ്. ആശുപത്രികളില് ചികിത്സയിലുള്ള രോഗികളും വളരെ കുറവാണ്. പുതിയ വകഭേദങ്ങളെ നിരീക്ഷിക്കാനായി ജനിതക ശ്രേണീകരണം കൂടുതല് ശക്തിപ്പെടുത്തും.
മരുന്നുകളുടേയും സുരക്ഷാ സാമഗ്രികളുടേയും ലഭ്യത കൂടുതലായി ഉറപ്പ് വരുത്താന് മന്ത്രി നിര്ദേശം നല്കി. എല്ലാ ആശുപത്രികളിലുമുള്ള ആശുപത്രി കിടക്കകള്, ഐസിയു, വെന്റിലേറ്റര് സൗകര്യങ്ങള്, അവയുടെ ഉപയോഗം എന്നിവ നിരന്തരം വിലയിരുത്താനും മന്ത്രി നിര്ദേശം നല്കി.