പോക്സോ പ്രതിയെ പിടികൂടാൻ എത്തിയ പൊലീസ് സംഘത്തിന് നേരെ ലഹരിമാഫിയയുടെ ആക്രമണം

കോഴിക്കോട് | കൊയിലാണ്ടിയിൽ പോക്സോ കേസിലെ പ്രതിയെ പിടികൂടാൻ എത്തിയ പൊലീസ് സംഘത്തിന് നേരെ ലഹരിമാഫിയ ആക്രമണം നടത്തി. തിങ്കളാഴ്ച വൈകിട്ട് കൊയിലാണ്ടി ചിത്രാ ടാക്കീസിന് സമീപത്തുവച്ചാണ് സംഭവം.

ആക്രമണത്തിൽ എസ്ഐ ജിതേഷ്, ഗ്രേഡ് എസ്ഐ അബ്ദുല്ല, സീനിയർ സിവിൽ പൊലീസ് ഓഫിസർമാരായ പ്രവീൺ കുമാർ, സിനു രാജ് എന്നിവർക്ക് പരിക്കേറ്റു. പരിക്കേറ്റ പോലീസുകാരെ താലൂക്ക് ആശുപത്രിയിൽ പ്രവേശിപ്പിച്ചു. സിനു രാജിന് നെഞ്ചിലും കൈയിലുമാണ് പരുക്ക്.

സംഭവത്തിൽ ഗുരുദേവ കോളജിലെ ഡിഗ്രി വിദ്യാർത്ഥിയായ അത്തോളി കൊങ്ങന്നൂർ മലയിൽ നോബിനെ (23) പൊലീസ് അറസ്റ്റ് ചെയ്തു. പോക്സോ കേസിലെ പ്രതിയെ ചോദ്യം ചെയ്യുന്നതിനിടെയാണ് ലഹരിമാഫിയ സംഘം പൊലീസിനെ കല്ലുകൊണ്ട് ആക്രമിച്ചത്.