മലപ്പുറത്ത് കാണാതായ പ്രതിശ്രുത വരനെ ഊട്ടിയില്‍ നിന്ന് കണ്ടെത്തി

മലപ്പുറം |  മലപ്പുറം പള്ളിപ്പുറത്ത് നിന്ന് കാണാതായ പ്രതിശ്രുത വരന്‍ വിഷ്ണുജിത്തിനെ കണ്ടെത്തി. ഊട്ടിയില്‍ നിന്നാണ് മലപ്പുറം പോലീസിന്റെ പ്രത്യേക അന്വേഷണ സംഘം യുവാവിനെ കണ്ടെത്തിയത്. ആറ് ദിവസം മുമ്പാണ് വിഷ്ണുജിത്തിനെ കാണാതായത്.

നാലാം തീയതി വിഷ്ണു പാലക്കാട് ബസ്റ്റാന്റില്‍ നിന്ന് ബസ് കയറുന്ന സി സി ടി വി ദൃശ്യം ലഭിച്ചിരുന്നു.യുവാവ് തന്നെയാണ് ദൃശ്യത്തിലുള്ളതെന്ന് കുടുംബവും സ്ഥിരീകരിച്ചു.ഇതോടെ ഡിവൈ എസ് പിയുടെ നേതൃത്വത്തില്‍ പോലീസ് രണ്ട് സംഘങ്ങളായി തിരിഞ്ഞ് തിരച്ചില്‍ നടത്തുകയായിരുന്നു.

കഴിഞ്ഞ ദിവസമായിരുന്നു മലപ്പുറം പള്ളിപ്പുറം സ്വദേശിയായ വിഷ്ണുജിത്തിന്റെ വിവാഹം മഞ്ചേരി സ്വദേശിനിയായ യുവതിയുമായി നടക്കേണ്ടിയിരുന്നത്. ഇവര്‍ വര്‍ഷങ്ങളായി സുഹൃത്തുക്കളാണ്. പാലക്കാട് കഞ്ചിക്കോട് ഐസ്‌ക്രീം കമ്പനിയില്‍ ജോലിക്കാരനാണ് വിഷ്ണുജിത്ത്. കുറച്ച് പണം കിട്ടാനുണ്ടെന്നും ഉടന്‍ തിരിച്ച് വരാമെന്നും പറഞ്ഞാണ് വിഷ്ണുജിത്ത് നാലാം തീയതി പാലക്കാട്ടേക്ക് പോയത്. തുടര്‍ന്ന് യുവാവിനെ കാണാതാവുകയായിരുന്നു.