മരണം മണക്കുന്ന അകത്തളങ്ങൾ

മലയാളികളുടെ ഇടയിലേക്ക്​ ഇത്തവണ പുതുവർഷപുലരി എത്തിയത്​​ വളരെ വ്യത്യസ്തമായ ഒരു കൊലപാതക വാർത്തയുമായാണ്. തൃശൂർ നഗരമധ്യത്തിൽ പുതുവർഷത്തലേന്ന് കൗമാരക്കാരുടെ കുത്തേറ്റ് 29 കാരനായ യുവാവ് കൊല്ലപ്പെട്ടു എന്നതായിരുന്നു ആ വാർത്ത. പ്രതികളാവട്ടെ 14ഉം 15ഉം വയസ്സ് പ്രായമുള്ള കുട്ടികളും. പാലിയം റോഡിൽ എടക്കളത്തൂർ വീട്ടിൽ ജോൺ ഡേവിഡിന്റെ മകൻ ലിവിൻ (29) ആണ് കൊല്ലപ്പെട്ടത്.

മയക്കുമരുന്ന് ഉപയോഗിക്കുകയാണെന്ന് കരുതി ലിവിൻ ചോദ്യം ചെയ്തതിൽ പ്രകോപിതരായാണ്​ പ്രതികൾ ലിവിനെ കുത്തിയതെന്നാണ്​ പോലീസിന്റെ എഫ്‌ ഐ ആറിൽ പറയുന്നത്. സഹപാഠിയെ കത്തി കാട്ടി ഭീഷണിപ്പെടുത്തിയതിന്​ ഇതിൽ ഒരു പ്രതിയെ സ്‌കൂളിൽ നിന്ന് നേരത്തെ പുറത്താക്കിയിരുന്നു. പ്രതികൾ മയക്കുമരുന്ന്​ ഉപയോഗിക്കുന്നവരാണെന്നാണ്​ പോലീസിന് ലഭിച്ച സൂചന.

ഈ സംഭവം നടന്ന്​ കൃത്യം മൂന്നാഴ്ച പിന്നിടുന്നതിന്​ മുമ്പായി കോഴിക്കോട്​ ജില്ലയിലെ താമരശ്ശേരിയില്‍ ലഹരി മരുന്നിന് അടിമയായ മകന്‍ അമ്മയെ വെട്ടിക്കൊന്ന സംഭവവും കേരളത്തെ ഞെട്ടിച്ചു. താമരശ്ശേരി അടിവാരം സ്വദേശിനി സുബൈദ (53) യാണ് 25 കാരനായ മകന്‍ ആഷികിന്റെ വെട്ടേറ്റ്​ മരിച്ചത്​. ബംഗളുരുവിലെ ലഹരിമുക്തി ചികിത്സാകേന്ദ്രത്തിൽ കഴിയുകയായിരുന്ന ആഷിക് മാതാവിനെ കാണാന്‍ എത്തിയപ്പോഴായിരുന്നു കൊലപാതകം. ആഷിക് കോളജ് പഠന കാലത്തുതന്നെ ലഹരിക്ക് അടിമയായിരുന്നുവെന്ന്​ കൊല്ലപ്പെട്ട സുബൈദയുടെ ​സഹോദരി പോലീസിന്​ മൊഴി നൽകിയിട്ടുണ്ട്​.

ഇത്തരം വാർത്തകൾ ഇന്ന്​ പത്രങ്ങളിലും ടെലിവിഷൻ ചാനലുകളിലും പതിവായിക്കഴിഞ്ഞു. ഏകദേശം അരനൂറ്റാണ്ട്​ മുമ്പ്​ ഇത്തരമൊരു വാർത്ത മലയാളികളിൽ നടുക്കവും അത്ഭുതവും സൃഷ്ടിച്ചിരുന്നു. 1980ൽ നടന്ന കരിക്കൻ വില്ല കൊലപാതകം തന്നെ ഇതിന്​ ഉദാഹരണമാണ്​.
1980 ഒക്ടോബറിലാണ്​ കെ സി ജോർജും ഭാര്യ റേച്ചലും മീനത്തലക്കരയിലെ കരിക്കൻ വില്ലയിൽ കൊല്ലപ്പെട്ടത്. മുഖ്യപ്രതിയും ഇവരുടെ ബന്ധുവുമായ റെനി ജോർജും കൂട്ടാളികളും മയക്കുമരുന്നിന് അടിമകളായിരുന്നു എന്നാണ്​ അന്ന്​ പോലീസ്​ കണ്ടെത്തിയത്​.മയക്കുമരുന്ന് ശീലത്തിന് പണം കണ്ടെത്താനാണ് ഇവർ കൊലപാതകം നടത്തിയതെന്ന വാർത്ത അന്ന്​ സമൂഹത്തിൽ വലിയ ചർച്ചയായിരുന്നു.

ഈ അരനൂറ്റാണ്ട്​ കാലത്തിനിടക്ക്​ നമ്മുടെ കൊച്ചു കേരളത്തിൽ തന്നെ ഇത്തരത്തിലുള്ള നൂറുകണക്കിന്​ കേസുകൾ റിപോർട്ട്​ ചെയ്തു. ഇന്നിപ്പോഴാകട്ടെ ഇത്തരം സംഭവങ്ങൾ മലയാളിക്ക്​ പതിവ്​ വാർത്തകളായി മാറിയിരിക്കുന്നു.

ആഗോള പ്രശ്നം

ആഗോള തലത്തിൽ തന്നെ വ്യക്തികളെയും കുടുംബങ്ങളെയും സമൂഹത്തെയും തന്നെ ബാധിക്കുന്ന വ്യാപകവും വിനാശകരവുമായ ഒരു പ്രശ്നമാണ് മയക്കുമരുന്ന് ഉപയോഗം. മയക്കുമരുന്ന് ഉപയോഗവും കുറ്റകൃത്യങ്ങളും തമ്മിലുള്ള ബന്ധം, പ്രത്യേകിച്ച് കൊലപാതകങ്ങൾ ഒരാഗോള പ്രതിഭാസമാണ്​. മയക്കുമരുന്നിന് അടിമകളായ വരെ സംബന്ധിച്ച പഠനങ്ങളും സംഭവങ്ങളും ലഹരിവസ്തുക്കളുടെ ഉപയോഗവും ആക്രമണോത്സുകമായ പെരുമാറ്റവും തമ്മിലുള്ള ബന്ധത്തിന്​ വ്യക്തമായ തെളിവുകൾ മുന്നോട്ടുവെക്കുന്നവയാണ്​​.

മയക്കുമരുന്ന് ഉപയോഗവും പെരുമാറ്റ വെകല്യവും

മയക്കുമരുന്ന് ഉപയോഗം, പ്രത്യേകിച്ച് കഞ്ചാവ്​, ബ്രൗൺ ഷുഗർ, എം ഡി എം എ പോലുള്ള രാസലഹരികൾ ഒരു വ്യക്തിയുടെ മസ്തിഷ്കത്തിൽ അപകടകരമായ രീതിയിൽ രാസമാറ്റങ്ങൾ സൃഷ്ടിക്കുകയും അവരുടെ വിശേഷബുദ്ധിയെ ഇല്ലാതാക്കുകയും ചെയ്യും. മയക്കുമരുന്നിന്റെ സ്വാധീനത്തിലായിരിക്കുമ്പോൾ, വ്യക്തികൾ അമിതാവേശത്തോടെയും യുക്തിരഹിതമായും പ്രവർത്തിക്കുമെന്നാണ്​ ഇത്തരം രാസലഹരികളുടെ പ്രത്യേകത. ചിലപ്പോഴെല്ലാം ഇത്​ കൊലപാതകം പോലുള്ള അക്രമങ്ങളിലേക്കും​ നയിച്ചേക്കും. തങ്ങൾ ചെയ്യുന്ന പ്രവർത്തനങ്ങളുടെ അനന്തരഫലങ്ങൾ വിലയിരുത്താനുള്ള കഴിവ് ഇല്ലാതാകുന്നതാണ്​ മയക്കുമരുന്നിന്​ അടിമകളായവർ ഇത്തരം അ​ക്രമങ്ങളിൽ ഏർപ്പെടാനുള്ള കാരണം. ഒരിക്കൽ ഉപയോഗിച്ചു തുടങ്ങിയാൽ പിന്നീട്​ അതിന്റെ ഉപയോഗത്തിൽ നിന്ന്​ രക്ഷനേടുവാൻ ​വളരെ പ്രയാസമാണെന്നതാണ്​ ഇത്തരം രാസലഹരികൾ സൃഷ്ടിക്കുന്ന ഏറ്റവും വലിയ അപകടം.

പിന്നിൽ സാമൂഹിക സാമ്പത്തിക ഘടകങ്ങൾ

വളരെ പെട്ടെന്ന്​ വൻതോതിൽ പണം സമ്പാദിക്കുക എന്ന ലക്ഷ്യമാണ്​ മയക്കുമരുന്ന്​ വിപണിക്ക്​ പിറകിലുള്ളവരുടെ ലക്ഷ്യമെങ്കിൽ ജീവിത യാഥാർഥ്യങ്ങളെ നേരിടാതെ അതിൽനിന്ന്​ രക്ഷപ്പെടാൻ വഴിതേടുന്നവരാണ്​ പലപ്പോഴും ലഹരികൾക്ക്​ പിറകെ പോകുന്നത്​. കൗമാര പ്രായത്തിൽ വെറുതെ ഒരു രസത്തിന്​ വേണ്ടിയോ കൂട്ടുകാരുടെ നിർബന്ധത്തിന്​ വഴങ്ങിയോ ആരംഭിക്കുന്ന ലഹരിയുപയോഗം പിന്നീട്​ അതിൽ നിന്ന്​ രക്ഷപ്പെടാൻ കഴിയാത്ത രീതിയിൽ വ്യക്തികളെ അടിമകളാക്കി മാറ്റുന്നു.

മയക്കുമരുന്നിന് അടിമയാകുന്നവരിൽ വലിയൊരു വിഭാഗം വൈകാരികവും മാനസികവുമായ പ്രശ്നങ്ങളെ നേരിടുന്നവരായിരിക്കുമെന്ന്​ ചില പഠനങ്ങൾ പറയുന്നു. ഇത്തരം മാനസികാവസ്ഥകൾ സൃഷ്ടിക്കുന്ന സമ്മർദങ്ങളുടെ കൂടെ ലഹരിയുടെ ഉപയോഗം കൂടി ചേരുമ്പോൾ അത്​ അക്രമാസക്തമായ പെരുമാറ്റത്തിനുള്ള സാധ്യത വർധിപ്പിക്കുകയാണ്​ ചെയ്യുക. ഇക്കൂട്ടരിൽ സാമൂഹിക പിന്തുണ ലഭിക്കാതിരിക്കുകയോ ചികിത്സക്ക്​ വിധേയരാക്കപ്പെടുകയോ ചെയ്യാത്തവർ പിന്നീട്​ കുറ്റകൃത്യങ്ങളുടെ ലോകത്തേക്ക്​ നയിക്കപ്പെട്ടേക്കാം.കുറ്റവാളികൾ അടങ്ങിയ ഒരുതരം അധോലോകത്തിലെത്തിപ്പെടുമ്പോഴാകട്ടെ കൂടുതൽ ലഹരിയുപയോഗത്തിനുള്ള സാധ്യതകൾ തുറന്നുകിട്ടുകയും പലരും ലഹരിക്ക്​ അടിമകളായി മാറുകയും ചെയ്യും.

ഇരകളിലുണ്ടാക്കുന്ന ആഘാതം

മയക്കുമരുന്നിന് അടിമകളായ വ്യക്തികൾ പലപ്പോഴും സ്വന്തം കുടുംബങ്ങളിൽ മാത്രമല്ല സമൂഹത്തിന്​ തന്നെ തലവേദനയായിത്തീരുകയാണ്​ പതിവ്​. പൊതുമുതൽ നശിപ്പിക്കുക, ​ബലാൽസംഗം, മോഷണം, കവർച്ച തുടങ്ങിയ കുറ്റകൃത്യങ്ങളിൽ ഏർപ്പെടുക എന്നിവയെല്ലാം ലഹരിയുപയോഗം സൃഷ്ടിക്കുന്ന ദുരന്തങ്ങളാണ്​. ഇത്തം അ​ക്രമസംഭവങ്ങൾക്കിടയിൽ അത്​ ഒരു കൊലപാതകത്തിൽ കലാശിക്കുകയാണെങ്കിൽ അതിന്റെ അനന്തരഫലം ഒരു വ്യക്തിയുടെ ജീവൻ നഷ്ടപ്പെടുന്നതിനും അപ്പുറമാണ്. ഒരാളെ നഷ്ടപ്പെടുന്നതിന്റെ വൈകാരിക ആഘാതം നേരിടുന്നത്​ കൊല്ലപ്പെടുന്നവരുടെ കുടുംബാംഗങ്ങൾ മാത്രമല്ല ലഹരിക്കടിമപ്പെട്ട്​ കൊലപാതകം നടത്തുന്നവരുടെ കുടുംബങ്ങൾ കൂടിയാണ്​.

കൂടാതെ ഇത്തരം സംഭവങ്ങൾ സാമൂഹത്തിന്റെ സമാധാനം, പൊതു സുരക്ഷ എന്നിവയെയും ദോഷകരമായി ബാധിക്കുന്നുണ്ട്. മയക്കുമരുന്ന് ആസക്തിയും അതുമായി ബന്ധപ്പെട്ട അക്രമങ്ങളും കൂടുതലുള്ള പ്രദേശങ്ങളിലെ ജനങ്ങളുടെ ജീവിതം ദുസ്സഹമാകുന്നത്​ ഇതിന്​ ഉദാഹരണമാണ്​.

ചികിത്സയും പുനരധിവാസവും

ഭീഷണികൊണ്ടോ സ്​നേഹപൂർണമായ ഉപദേശം കൊണ്ടോ ഒരു വ്യക്തിയെയും​ മയക്കുമരുന്ന് ആസക്തിയിൽനിന്ന്​ പിന്തിരിപ്പിക്കാൻ കഴിയില്ല. കാരണം, ലഹരിക്ക്​ അടിമപ്പെടുന്നത്​ ഒരു രോഗമാണ്.ഏതൊരു രോഗത്തെയും പോലെ ഇതിനും ശാസ്​ത്രീയമായ ചികിത്സ ആവശ്യമാണ്. കൂടാതെ ചികിത്സയിലൂടെ സാധാരണ ജീവിതത്തിലേക്ക്​ തിരികെ എത്തുന്നവർ വീണ്ടും ലഹരിയുടെ ലോകത്തിലേക്ക്​ തിരിച്ചുപോകുന്നത്​ തടയാൻ മെച്ചപ്പെട്ട ജീവിത സൗകര്യങ്ങൾ നൽകി പുനരധിവസിപ്പിക്കുകയും വേണം. ചികിത്സയുടെ ഭാഗമായി മരുന്ന്​ ചികിത്സ, കൗൺസലിംഗ്, സൈക്കോ തെറാപ്പി, സാമൂഹിക പിന്തുണ എന്നിവ നൽകേണ്ടിവന്നേക്കാം. പലപ്പോഴും പരിചയസമ്പന്നനായ ഒരു മനോരോഗ വിദഗ്ധന്റെ നേതൃത്വത്തിലായിരിക്കും ചികിത്സകൾ നടത്തുന്നത്​. ഇ​ത്തരം ചികിത്സകളോടൊപ്പം കുടുംബാംഗങ്ങളുടെ പിന്തുണയും അത്യാവശ്യമാണ്​. ​

നിയമത്തിന്റെ ഇടപെടൽ അനിവാര്യം

വ്യക്തികളെ ലഹരിയിൽ നിന്ന്​ മോചിപ്പിക്കുന്നതിനോടൊപ്പം മയക്കുമരുന്ന് വ്യാപാരവും ഇതുമായി ബന്ധപ്പെട്ട കുറ്റകൃത്യങ്ങളും തടയുന്നതിന്​ ശക്തമായ നിയമനിർമാണം ആവശ്യമാണ്. മയക്കുമരുന്നുകളുടെ വ്യാപനം തടയുന്നതിന്​ സർക്കാർ ഏജൻസികളും നിയമപാലകരും മുൻഗണന നൽകുകയും പൊതുസമൂഹത്തിന്റെ പിന്തുണയോടെ അവ ഫലപ്രദമായി നടപ്പാക്കുകയും വേണം.പ്രൈമറി ക്ലാസ്സുകളിൽ നിന്ന്​ തുടങ്ങി ലഹരിക്കെതിരായ പോരാട്ടം ഒരു പാഠ്യവിഷയം ആക്കേണ്ടതും അനിവാര്യമാണ്​.

ലഹരിയുടെ ദൂഷ്യവശങ്ങളെക്കുറിച്ചുള്ള പാഠഭാഗങ്ങൾ സിലബസ്സുകളിൽ ഉൾപ്പെടുത്തുകയും വിദ്യാലയങ്ങളിൽ നിരന്തരമായ ബോധവത്​കരണം നടത്തുകയും വേണം. വിവാഹം പോലുള്ള ആഘോഷങ്ങളോടനുബന്ധിച്ചുള്ള മദ്യസത്​കാരത്തിനെതിരെയും വേണം ബോധവത്​കരണം. ഇതിന്​ മതസംഘടനകൾക്കും വലിയൊരു പങ്ക്​ വഹിക്കാനാകും. മയക്കുമരുന്നുകൾക്കെതിരായ പ്രതിരോധപ്രവർത്തനങ്ങൾ, ലഹരിയുപയോഗം ശ്രദ്ധയിൽപ്പെട്ടാൽ നേരത്തെയുള്ള ഇടപെടൽ, ചികിത്സ എന്നിവക്കായി അധ്യാപകർ, ആരോഗ്യപ്രവർത്തകർ, റസിഡൻസ്​ അസോസിയേഷനുകൾ പോലെയുള്ള കൂട്ടായ്മകൾ, സാമൂഹിക സംഘടനകൾ എന്നീ ഘടകങ്ങൾ ഒത്തൊരുമിച്ച് പ്രവർത്തിച്ചാൽ മാത്രമേ ലഹരിക്കെതിരായ പോരാട്ടം ലക്ഷ്യം കാണുകയുള്ളൂ.

(ലേഖകൻ ചേതന സെന്റർ ഫോർ ന്യൂറോ സൈക്യാട്രി ഡയറക്ടറാണ്.)