നിര്‍ത്തിയിട്ടിരുന്ന ലോറിക്കു പിന്നില്‍ സ്‌കൂട്ടര്‍ ഇടിച്ചു; രണ്ട് യുവാക്കള്‍ക്ക് ദാരുണാന്ത്യം

പന്തളം | വാഹനാപകടത്തില്‍ രണ്ട് യുവാക്കള്‍ക്ക് ദാരുണാന്ത്യം. പന്തളം മാന്തുകയിലാണ് അപകടമുണ്ടായത്. നിര്‍ത്തിയിട്ടിരുന്ന ലോറിക്കു പിന്നില്‍ സ്‌കൂട്ടര്‍ ഇടിക്കുകയായിരുന്നു.

അപകടത്തില്‍ സ്‌കൂട്ടറില്‍ സഞ്ചരിച്ചിരുന്ന വിഷ്ണു, വിശ്വജിത്ത് എന്നിവര്‍ മരിച്ചു. സ്‌കൂട്ടറില്‍ ഒപ്പമുണ്ടായിരുന്ന അമല്‍ജിത്തിന് പരുക്കേറ്റു.

ഇന്നലെ രാത്രി 11.30ഓടെ എം സി റോഡിലാണ് അപകടം. മൂന്ന് യുവാക്കള്‍ സഞ്ചരിച്ചിരുന്ന സ്‌കൂട്ടര്‍ നിയന്ത്രണം വിട്ട് നിര്‍ത്തിയിട്ടിരുന്ന തടിലോറിക്ക് പിന്നില്‍ ഇടിക്കുകയായിരുന്നു. ഗുരുതരമായി പരുക്കേറ്റ അമല്‍ജിത്തിനെ ആദ്യം ചെങ്ങന്നൂര്‍ താലൂക്ക് ആശുപത്രിയിലും പിന്നീട് വണ്ടാനം മെഡിക്കല്‍ കോളജ് ആശുപത്രിയിലും പ്രവേശിപ്പിച്ചു.

ഇടക്കിടെ അപകടങ്ങളുണ്ടാകുന്ന മേഖലയാണ് പന്തളം-മാന്തുക. അഞ്ച് വര്‍ഷത്തിനിടെ 150ലേറെ പേരാണ് ഇവിടെ വിവിധ അപകടങ്ങളിലായി മരിച്ചത്.