പമ്പയാറ്റില്‍ ഉണ്ടെന്ന് സംശയിക്കുന്ന യുവതിക്കായുള്ള തിരച്ചില്‍ നാലാം നാളും വിഫലം

പന്തളം| ചെങ്ങന്നൂര്‍, കല്ലിശ്ശേരിയിലെ പമ്പയാറ്റില്‍ അകപ്പെട്ടു എന്ന് സംശയിക്കുന്ന യുവതിക്കായുള്ള തിരച്ചില്‍ നാലാം നാളും വിഫലം. പന്തളം, മങ്ങാരം, ആശാരി അയ്യത്ത് പടിഞ്ഞാറ്റിയത് എ.ബി സുധീര്‍ഖാന്റെ ഭാര്യ ഫാത്തിമ (38)യ്ക്കായാണ് തിരച്ചില്‍ നടത്തിയത്. കഴിഞ്ഞ ഞായറാഴ്ച മുതലാണ് ഇവരെ കാണാതായത്.

ഞായറാഴ്ച ഉച്ചയ്ക്ക് ഒന്നരയോടെ എം.സി റോഡില്‍ ചെങ്ങന്നൂര്‍ കല്ലിശ്ശേരി പാലത്തിന് സമീപം ഫാത്തിമ ഓടിച്ചിരുന്ന സ്‌കൂട്ടറും അരികിലെ പമ്പയാറ്റില്‍ കടവിന് സമീപം ഫാത്തിമയുടെ ഫോണും, പേഴ്‌സും ഉള്‍പ്പെടെ കണ്ടെത്തിയിരുന്നു. യുവതി ആറ്റില്‍ ചാടിയതാകാം എന്ന സംശയത്തില്‍ കഴിഞ്ഞ മൂന്ന് ദിവസമായി അഗ്‌നി രക്ഷാ സേനയും, നാട്ടുകാരും, ഈരാറ്റുപേട്ടയില്‍ നിന്നും എത്തിയ പ്രത്യേക മുങ്ങല്‍ വിദഗ്ധരും തിരച്ചില്‍ നടത്തി. എന്നാല്‍ ആറ്റില്‍ അകപ്പെട്ട വീട്ടമ്മയെ കണ്ടെത്താന്‍ കഴിഞ്ഞിട്ടില്ല.

പരിസരത്തുള്ള സി സി ടി വി കാമറയില്‍ യുവതി ആറ്റിലേക്ക് ഇറങ്ങുന്നതായി ശ്രദ്ധയില്‍പ്പെട്ടിട്ടുണ്ട്. യുവതിക്കായുള്ള തിരച്ചിലിനായി ബുധനാഴ്ച നാവികസേനയുടെ സഹായവും തേടിയിട്ടുണ്ട്.