International
സ്റ്റാർലൈനറിന്റെ തകരാർ ഇനിയും പരിഹരിക്കാൻ ആയില്ല; സുനിത വില്യംസ് ഭൂമിയിലെത്താൻ മാസങ്ങൾ എടുത്തേക്കും
സ്റ്റാർ ലൈനറിന്റെ ദൗത്യത്തിന്റെ ദൈർഘ്യം 45 ദിവസത്തിൽ നിന്ന് 90 ദിവസമായി നീട്ടുന്നത് ബഹിരാകാശ ഏജൻസി പരിഗണിക്കുന്നതായി നാസയുടെ കൊമേഴ്സ്യൽ ക്രൂ പ്രോഗ്രാം മാനേജർ സ്റ്റീവ് സ്റ്റിച്ച് പറഞ്ഞതായി സിഎൻഎൻ റിപ്പോർട്ട് ചെയ്തു
![](https://assets.sirajlive.com/2024/06/sunitha-williams-starliner-897x538.jpg)
വാഷിംഗ്ടൺ | ഇന്ത്യന് വംശജയായ ബഹിരാകാശ യാത്രിക സുനിതാ വില്യംസ് ഭൂമിയിൽ തിരിച്ചെത്താൻ ഇനിയും മാസങ്ങൾ എടുത്തേക്കുമെന്ന് റിപ്പോർട്ട്. സ്റ്റാർ ലൈനറിന്റെ ദൗത്യത്തിന്റെ ദൈർഘ്യം 45 ദിവസത്തിൽ നിന്ന് 90 ദിവസമായി നീട്ടുന്നത് ബഹിരാകാശ ഏജൻസി പരിഗണിക്കുന്നതായി നാസയുടെ കൊമേഴ്സ്യൽ ക്രൂ പ്രോഗ്രാം മാനേജർ സ്റ്റീവ് സ്റ്റിച്ച് പറഞ്ഞതായി സിഎൻഎൻ റിപ്പോർട്ട് ചെയ്തു. സുനിതയും ബുച്ച് വിൽമോറും സുരക്ഷിതരായി തിരിച്ചെത്തുമെന്ന് ഉറപ്പുണ്ടെന്നും അവർ വ്യക്തമാക്കി.
പേടകത്തിന്റെ തകരാര് പരിഹരിക്കാന് ഇനിയും സമയമെടുക്കുമെന്നതിനാലാണ് സുനിതയുടെയും സഹയാത്രികന് യൂജിന് ബുച്ച് വില്മോറിന്റെയും മടക്കയാത്ര വൈകുന്നത്. ബോയിങ് സ്റ്റാര്ലൈനര് അന്താരാഷ്ട്ര ബഹിരാകാശ നിലയത്തിന് അരികിലെത്തിയപ്പോള് പേടകത്തില്നിന്ന് ഹീലിയം വാതകച്ചോര്ച്ചയുണ്ടായതാണ് പ്രതിസന്ധിക്ക് കാരണമായത്. ചില യന്ത്രഭാഗങ്ങള് പ്രവര്ത്തിപ്പിക്കാന് കഴിയാതിരുന്നത് ദൗത്യം ദുഷ്കരമാക്കിയിരുന്നു.
യാത്രികരുടെ സുരക്ഷ പരിഗണിച്ച് പേടകത്തിന്റെ സാങ്കേതിക പ്രശ്നങ്ങള് വീണ്ടും പരിശോധിച്ച ശേഷമേ മടക്കയാത്രയ്ക്ക് നാസ അനുമതി നല്കുകയുള്ളൂ. പലവട്ടം മാറ്റിവച്ചശേഷം ജൂണ് അഞ്ചിനാണ് സ്റ്റാര്ലൈനര് ബഹിരാകാശത്തേക്കു തിരിച്ചത്. നാസയുടെ കൊമേഴ്സ്യല് ക്രൂ പദ്ധതിയുടെ ഭാഗമായുള്ളതാണ് സ്റ്റാര്ലൈനര് വിക്ഷേപണം. വാണിജ്യ ആവശ്യങ്ങള്ക്കായി സ്റ്റാര്ലൈനര് എങ്ങനെ ഉപയോഗിക്കാം എന്നതിനെക്കുറിച്ചാണ് നാസയുമായി ചേര്ന്നുളള പരീക്ഷണം. നാസയുടെ ഈ ദൗത്യത്തിന് പേര് നല്കിയിരുന്നത് ക്രൂ ഫ്ളൈറ്റ് ടെസ്റ്റ് എന്നാണ്.
ലോകമെമ്പാടുമുള്ള വിമാനങ്ങള്, റോട്ടര്ക്രാഫ്റ്റുകള്, റോക്കറ്റുകള്, ഉപഗ്രഹങ്ങള്, മിസൈലുകള് എന്നിവ രൂപകല്പ്പന ചെയ്യുകയും നിര്മിക്കുകയും വില്ക്കുകയും ചെയ്യുന്ന അമേരിക്കന് ആസ്ഥാനമായ ബഹുരാഷ്ട്ര കോര്പറേഷനാണ് ബോയിങ് കമ്പനി. ഈ ദൗത്യത്തോടെ ബഹിരാകാശത്തേക്കുള്ള പരീക്ഷണ ദൗത്യത്തില് പേടകം പറത്തുന്ന ആദ്യ വനിതയായി സുനിത മാറി.
ഇന്ത്യന് വംശജയായ സുനിതാ വില്യംസിന്റെ മൂന്നാമത്തെ ബഹിരാകാശ യാത്രയണിത്. 2006 ഡിസംബര് ഒമ്പതിനാണ് ഡിസ്കവറി ബഹിരാകാശ പേടകത്തില് സുനിത വില്യംസ് തന്റെ ആദ്യത്തെ ബഹിരകാശ യാത്ര നടത്തിയത്. തുടര്ന്ന് 2012ല് അവര് രണ്ടാമത്തെ യാത്ര നടത്തി. നാസയുടെ കണക്കുപ്രകാരം അവര് ബഹിരാകാശത്ത് 322 ദിവസം ചിലവഴിച്ചിട്ടുണ്ട്. ഏഴ് ബഹിരകാശനടത്തത്തിലൂടെ 50 മണിക്കൂര് 40 മിനിട്ട് ചിലവഴിച്ച ആദ്യ വനിത ബഹിരാകാശ യാത്രിക എന്ന റെക്കോര്ഡും സുനിതക്ക് സ്വന്തമാണ്. ഗുജറാത്തിലെ മെഹ്സാന ജില്ലയിലെ ജുലാസാനില് ജനിച്ച സുനിത പിന്നീട് അമേരിക്കയിലേക്ക് കുടിയേറുകയായിരുന്നു.