ലോകചാമ്പ്യന്‍മാരെ തകര്‍ത്ത് സ്വീഡിഷ് പട; അമേരിക്ക ലോകകപ്പില്‍ നിന്ന് പുറത്ത്

മെല്‍ബണ്‍ | നിലവിലെ ലോക ചാമ്പ്യന്‍മാരായ അമേരിക്ക ഫിഫ വനിതാ ലോകകപ്പില്‍ നിന്ന് പുറത്തായി. നോക്കൗട്ടില്‍ സ്വീഡനോട് തോറ്റാണ് ക്വാര്‍ട്ടര്‍ കാണാതെ അമേരിക്ക പുറത്താകുന്നത്. പെനല്‍റ്റി ഷൂട്ടൗട്ടിലാണ് സ്വീഡിഷ് പടയുടെ വിജയം. സ്‌കോര്‍ 5- 4 (0-0).

രണ്ട് തവണ തുടര്‍ച്ചയായി കിരീടം ചൂടിയ അമേരിക്ക ഹാട്രിക് ലക്ഷ്യംവെച്ചാണ് ഇത്തവണ ഇറങ്ങിയിരുന്നത്. മൊത്തം നാല് തവണ അമേരിക്കന്‍ വനിതകള്‍ ലോകകപ്പ് സ്വന്തം രാജ്യത്തെത്തിച്ചിട്ടുണ്ട്. 2011ലെ ഫൈനലില്‍ ജപ്പാനോടും പെനല്‍റ്റിയില്‍ അമേരിക്ക പരാജയപ്പെട്ടിരുന്നു.

സ്വീഡന്റെ അഞ്ചാം കിക്ക് വാറിലൂടെയാണ് ഗോളാണെന്ന് സ്ഥിരീകരിച്ചത്. സ്വീഡന്റെ ലിന ഹര്‍ട്ടിഗ് എടുത്ത കിക്കാണ് വാറിന് വിധേയമായത്. മറ്റൊരു മത്സരത്തില്‍ ദക്ഷിണാഫ്രിക്കയെ എതിരില്ലാത്ത രണ്ട് ഗോളിന് പരാജയപ്പെടുത്തി നെതര്‍ലാന്‍ഡ്‌സും ക്വാര്‍ട്ടര്‍ പ്രവേശം നേടി.