കോതമംഗലത്ത് ഇന്നലെ വനത്തില്‍ കാണാതായ മൂന്ന് സ്ത്രീകളേയും കണ്ടെത്തി

കൊച്ചി |  കോതമംഗലം കുട്ടമ്പുഴയില്‍ അട്ടിക്കളത്ത് വനത്തിലേക്ക് കയറിപ്പോയ പശുക്കളെ തിരയാന്‍ പോയി കാണാതായ മൂന്ന് സ്ത്രീകളെയും തിരച്ചില്‍ സംഘം കണ്ടെത്തി. മൂന്ന് പേരെയും കണ്ടെത്തിയതായി മലയാറ്റൂര്‍ ഡിഎഫ്ഒ സ്ഥിരീകരിച്ചു. വനത്തില്‍ ആറ് കിലോമീറ്റര്‍ അകലെയാണ് ഇവരെ കണ്ടെത്തിയത്. മൂന്ന് പേരും സുരക്ഷിതരാണെന്നും ഡിഎഫ്ഒ പറഞ്ഞു. ഒരു മണിക്കൂറിനകം മൂന്ന് പേരെയും തിരച്ചില്‍ സംഘം പുറത്തെത്തിക്കുമെന്നും അദ്ദേഹം വ്യക്തമാക്കി

വനംവകുപ്പും പോലീസും ചേര്‍ന്ന് ഇന്നലെ രാത്രി വൈകിയും തിരച്ചില്‍ തുടര്‍ന്നെങ്കിലും സ്ത്രീകളെ കണ്ടെത്താനായിരുന്നില്ല. പശുക്കളെ തിരഞ്ഞ് വനത്തിലേക്ക് പോയ പാറുക്കുട്ടി, മായ, ഡാര്‍ലി സ്റ്റീഫന്‍ എന്നിവരെയാണ് കാണാതായത്.മായയുടെ പശുക്കളെ കണ്ടെത്താനാണ് മറ്റ് രണ്ട് പേരും ഇവരോടൊപ്പം കാട്ടിലേക്ക് പോയത്. ഇവരെ കണ്ടെത്താന്‍ രാത്രി വൈകിയും തെര്‍മല്‍ ക്യാമറ ഉപയോഗിച്ചുള്ള പരിശോധന നടത്തിയിരുന്നു.