വിദ്യാർഥികൾ യാത്ര ചെയ്യുന്നതിന്റെ നേട്ടങ്ങൾ ഏറെയാണ്

യാത്ര എല്ലാവർക്കും ഇഷ്ടമുള്ള കാര്യമാണ്. മനസ്സൊന്നു റിലാക്സ് ആവാനും പുതിയ കാര്യങ്ങൾ എക്സ്പ്ലോർ ചെയ്യാനും യാത്ര സഹായിക്കും. എന്നാൽ വിദ്യാഭ്യാസ കാലഘട്ടത്തിലുള്ള വിദ്യാർഥികളുടെ യാത്രയ്ക്ക് മറ്റ് പല ഗുണങ്ങളും ഉണ്ടെന്നാണ് വിദഗ്ധർ പറയുന്നത്.

യാത്ര വിദ്യാർഥികൾക്ക് അവരുടെ വളർച്ചയെയും ഭാവി വിജയത്തെയും രൂപപ്പെടുത്തുന്ന നിരവധി വ്യക്തിഗത അക്കാദമിക സാമൂഹിക നേട്ടങ്ങൾ നേടിക്കൊടുക്കുന്നു. പുതിയ സംസ്കാരങ്ങൾ അനുഭവിക്കുന്നതിലൂടെ അനുകമ്പ വളർത്തിയെടുക്കാനും വ്യത്യസ്ത ജീവിത രീതികളെ പരിശീലിക്കാനും സാധിക്കും.

വീട് വിട്ട് അജ്ഞാതമായ സ്ഥലത്തേക്ക് പോകുന്നതിന് ധൈര്യം ആവശ്യമാണ്.ഇത് വിദ്യാർഥികളിൽ പ്രതിരോധശേഷിയും ഏത് സാഹചര്യത്തിലും പിടിച്ചുനിൽക്കാനുള്ള കഴിവും നൽകും.

ഒറ്റക്കോ ഒരു ഗ്രൂപ്പിന് ഒപ്പമോ യാത്ര ചെയ്യുന്നത് ആത്മവിശ്വാസം വളർത്തുന്നു. കാരണം വിദ്യാർഥികൾ അപരിചിതമായ ചുറ്റുപാടുകളിൽ കൂടുതൽ ധൈര്യശാലികൾ ആകുന്നു.

ക്ലാസ് മുറികളിലെ അറിവിനെ ശക്തിപ്പെടുത്തുന്ന യഥാർത്ഥ ലോക പഠനാനുഭവങ്ങളിലേക്ക് വിദ്യാർഥികൾക്ക് കടന്നുചെല്ലാൻ സാധിക്കുന്നു.

വ്യത്യസ്തമായ ഒരു അന്തരീക്ഷത്തിൽ ആയിരിക്കുന്നത് കാഴ്ചപ്പാട് വിശാലമാക്കുന്നു. അനുമാനങ്ങളെ ചോദ്യം ചെയ്യാനും കൂടുതൽ തുറന്ന മനസ്സോടെ കാഴ്ചകൾ കാണാനും ഇത് ഉപകരിക്കും.

മാത്രമല്ല പുതിയ പുതിയ സ്ഥലങ്ങൾ സന്ദർശിക്കുന്നത് വിദ്യാർഥികളെ അവരുടെ വ്യക്തിത്വം കണ്ടെത്താനും അതുവഴി വീടിന്റെ പതിവ് രീതികളിൽ നിന്നും മാറാനും സഹായിക്കും.

യാത്ര വളർച്ചയും സ്വാതന്ത്ര്യവും പ്രോത്സാഹിപ്പിക്കുന്നു. വിദ്യാർഥികൾക്ക് പ്രശ്നങ്ങൾ പരിഹരിക്കാനും തീരുമാനങ്ങൾ എടുക്കാനും സ്വന്തമായി ജീവിതം നയിക്കാനും അവസരം നൽകുകയും ചെയ്യുന്നു എന്നാണ് ഗവേഷകർ പറയുന്നത്.