തിരുവനന്തപുരത്ത് ലഹരി മാഫിയ സംഘത്തിന്റെ അതിക്രമം; വീടുകളും വാഹനങ്ങളും അടിച്ച് തകര്‍ത്തു

തിരുവനന്തപുരം| തിരുവനന്തപുരത്തെ പൂച്ചെടിവിള കോളനിയിയില്‍ ലഹരി മാഫിയ സംഘത്തിന്റെ അതിക്രമം. കോളനിയിലെ മൂന്ന് വീടുകളും വാഹനങ്ങളും ലഹരി മാഫിയ സംഘം അടിച്ച് തകര്‍ത്തു.  പൂച്ചെടിവിള കോളനി അസോസിയേഷന്‍ സെക്രട്ടറി മനുവിന്റെയും ബന്ധുക്കളുടെയും വീടുകളാണ് അക്രമി സംഘം തകര്‍ത്തത്.

ഇന്നലെ രാത്രി 12.30 ഓടെയാണ് സംഭവമുണ്ടായത്. പത്തിലധികം പേരടങ്ങുന്ന സംഘം വീട്ടിലുണ്ടായിരുന്ന ഉപകരണങ്ങളും വാഹനങ്ങളും ഉള്‍പ്പെടെ തല്ലി തകര്‍ത്തിട്ടുണ്ട്. കോളനിയിലെ ലഹരി ഉപയോഗവും കച്ചവടവും മനു ചോദ്യം ചെയ്തിരുന്നു. കൂടാതെ തന്റെ നേര്‍ക്ക് നായയെ അഴിച്ചുവിട്ടതുമായി ബന്ധപ്പെട്ട് അയല്‍വാസിയായ ബിജു ലാലുമയി ചില തര്‍ക്കങ്ങളും ഉണ്ടായിരുന്നുവെന്നും ഇതാകാം അക്രമത്തിന് കാരണമെന്നും മനു വേണുഗോപാല്‍ പറഞ്ഞു.

മനുവിന്റെ രണ്ട് ബന്ധുക്കളുടെ വീടുകളും സംഘം ആക്രമിച്ചിട്ടുണ്ട്.  കോളനിയില്‍ പേടിച്ച് ജീവിക്കേണ്ട അവസ്ഥയാണെന്ന് അസോസിയേഷന്‍ പ്രസിഡന്റ് മോളി പറഞ്ഞു. സംഭവത്തില്‍ മ്യൂസിയം പോലീസ് അന്വേഷണം ആരംഭിച്ചു.