തോട്ടട ഐ ടി ഐ സംഘര്‍ഷം; കെ എസ് യു ജില്ലയില്‍ ഇന്ന് പഠിപ്പു മുടക്കും

കണ്ണൂര്‍ | തോട്ടട ഐ ടി ഐ സംഘര്‍ഷവുമായി ബന്ധപ്പെട്ട് കെ എസ് യു ജില്ലയില്‍ ഇന്ന് പഠിപ്പു മുടക്കും. പ്രൊഫഷണല്‍ കോളേജ് ഉള്‍പ്പെടെ ജില്ലയിലെ മുഴുവന്‍ ക്യാമ്പസുകളിലും പഠിപ്പു മുടക്ക് നടക്കും. സംസ്ഥാന വ്യാപകമായി പ്രതിഷേധവും സംഘടിപ്പിക്കും. സംഭവത്തില്‍ എസ് എഫ് ഐ – കെ എസ് യു പ്രവര്‍ത്തകര്‍ക്കെതിരെ പോലീസ് കേസെടുത്തു.

എസ് എഫ് ഐ പ്രവര്‍ത്തകരുമായുണ്ടായ സംഘര്‍ഷത്തില്‍ കഴുത്തിനും നട്ടെല്ലിനും പരിക്കേറ്റ കെ എസ് യു യൂണിറ്റ് പ്രസിഡന്റ് റിബിന്‍ കണ്ണൂരിലെ സ്വകാര്യ ആശുപത്രിയില്‍ തുടരുകയാണ്. സംഘര്‍ഷത്തെ തുടര്‍ന്ന് ഐ ടി ഐ അനിശ്ചിതകാലത്തേക്ക് അടച്ചിട്ടിരിക്കുകയാണ്.

പരിക്കേറ്റ കെഎസ് യു പ്രവര്‍ത്തകന്‍ മുഹമ്മദ് റിബിന്റെ പരാതിയില്‍ 11 എസ് എഫ് ഐ പ്രവര്‍ത്തകര്‍ക്കെതിരെയും പരിക്കേറ്റ എസ് എഫ് ഐ പ്രവര്‍ത്തകന്‍ ആഷിക്കിന്റെ പരാതിയില്‍ ആറ് കെ എസ് യു പ്രവര്‍ത്തകര്‍ക്ക് എതിരെയുമാണ് കേസെടുത്തത്.

പോലീസിന്റെ ഔദ്യോഗിക കൃത്യനിര്‍വഹണം തടസ്സപ്പെടുത്തിയതില്‍ 17 എസ് എഫ്‌ഐ, കെ എസ് യു പ്രവര്‍ത്തകരുടെ പേരിലും കേസുണ്ട്. മുഴുവന്‍ രാഷ്ട്രീയ സംഘടനകളെയും ഉള്‍പ്പെടുത്തി പോലീസ് സര്‍വകക്ഷിയോഗം വിളിച്ചിട്ടുണ്ട്.