വില്‍പ്പനയ്‌ക്കെത്തിച്ച ഹെറോയിനുമായി മൂന്നുപേര്‍ പിടിയില്‍

കൊണ്ടോട്ടി | മലപ്പുറത്ത് വില്‍പ്പനയ്‌ക്കെത്തിച്ച ഹെറോയിനുമായി മൂന്നുപേര്‍ പിടിയില്‍.
കൊണ്ടോട്ടി മേലങ്ങാടി നയ്യന്‍ മണ്ണാറില്‍ മുഹമ്മദ് അജ്മല്‍ (28) വൈത്തല പറമ്പില്‍ ഉമറുല്‍ ഫാറൂഖ് (30) നെടിയിരുപ്പ് സ്വദേശി തലാപ്പില്‍ യഥുന്‍ (28) എന്നിവരാണ് കൊണ്ടോട്ടിയില്‍ വെച്ച് പോലീസിന്റെ പിടിയിലായത്.  കൊണ്ടോട്ടി മണ്ണാറിലെ അജ്മലിന്റെ വീട്ടുപരിസരത്തുനിന്നും പിടികൂടിയ പ്രതികളില്‍ നിന്നും പത്ത് ഗ്രാം ഹെറോയിന്‍ പിടിച്ചെടുത്തു. പിടികൂടിയ ഹെറോയിന്‍ പ്രതികള്‍ മുബൈയില്‍ നിന്നും നാട്ടിലെത്തിച്ചതാണ്.

മൂന്നുപേരും കൊണ്ടോട്ടി, രാമനാട്ടുകര എന്നിവിടങ്ങള്‍ കേന്ദ്രീകരിച്ച് പ്രവര്‍ത്തിക്കുന്ന ലഹരിക്കടത്ത് സംഘത്തിലെ പ്രധാനികളാണ്. മലപ്പുറം ജില്ലാ പോലീസ് മേധാവിക്ക് ലഭിച്ച രഹസ്യവിവരത്തിന്റെ അടിസ്ഥാനത്തില്‍ നടത്തിയ പരിശോധനയിലാണ് പ്രതികള്‍ പിടിയിലായത്.

പ്രതി അജ്മല്‍ അഞ്ച് ലഹരി കേസുകളില്‍ പ്രതിയാണ്. യഥുന്‍ കൊണ്ടോട്ടിയില്‍ വധശ്രമക്കേസിലും ലഹരികേസിലും പ്രതിയാണ്. ഫാറൂഖ് വീട്ടില്‍ അതിക്രമിച്ച് കയറി സ്ത്രീയെ ഉപദ്രവിച്ച  കേസിലും ലഹരിക്കേസുകളിലും പ്രതിയാണ്.