ടിയാഗോ ഇ വി വിപണിയിൽ; വില 8.49 ലക്ഷം മുതൽ; രാജ്യത്തെ ഏറ്റവും വില കുറഞ്ഞ ഇലക്ട്രിക് കാർ

മുംബൈ | ഇന്ത്യയിലെ ഏറ്റവും വില കുറഞ്ഞ ഇലക്ട്രിക് കാർ വിപണിയിൽ എത്തിച്ച് ടാറ്റ. ടാറ്റ ടിയാഗോ ഇ വിയാണ് ഇന്ന് വിപിണിയിൽ അവതരിപ്പിച്ചത്. ഏഴ് വേരിയന്റുകളിലായി 8.49 ലക്ഷം മുതൽ 11.79 ലക്ഷം രൂപ വരെയാണ് കാറിന്റെ എക്സ് ഷോറൂം വില. ആദ്യത്തെ ആയിരം ഉപഭോക്താക്കൾക്കാകും 8.49 ലക്ഷം രൂപയെന്ന പ്രാരംഭ വിലയിൽ കാർ ലഭിക്കുക.

രണ്ട് ബാറ്ററി പാക്കുകളിൽ ടിയാഗോ ഇ വി ലഭ്യമാകും. എക്സ് ഇ, എക്സ് ടി വേരിന്റുകളിൽ 19.2 കിലോവാട്ട് ശേഷിയുള്ള ബാറ്ററിയാണ് ലഭിക്കുക. ഇത് ഒറ്റച്ചാർജിൽ 250 കിലോമീറ്റർ റേഞ്ച് നൽകും. എക്സ് ടി, എക്സ് ഇസഡ് പ്ലസ്, എക്സ് ഇസഡ് പ്ലസ് ടക് ലക്സ്, എക്സ് ഇസഡ് പ്ലസ്, എക്സ് ഇസഡ് പ്ലസ് ടെക് ലക്സ് വേരിയന്റുകകളിൽ 24 കിലോ വാട്ട് ബാറ്ററി പാക്കാണ് ലഭ്യമാകുക. ഇത് ഒരു ചാർജിംഗിൽ 315 കിലോമീറ്റർ മൈലേജ് നൽകും. ഏകദേശം 57 മിനിറ്റിനുള്ളിൽ ബാറ്ററി 80 ശതമാനം വരെ ചാർജ് ചെയ്യപ്പെടുമെന്ന് കമ്പനി അവകാശപ്പെടുന്നു. വെറും 5.7 സെക്കൻഡിൽ പൂജ്യത്തിൽ നിന്ന് 60 കിലോമീറ്റർ വേഗത കൈവരിക്കാനും ടിയാഗോ ഇ വിക്ക് കഴിയും.

രൂപകൽപ്പനയുടെ കാര്യത്തിൽ, സ്റ്റാൻഡേർഡ് ടിയാഗോയിൽ നിന്ന് ചെറിയ ചില വ്യത്യാസങ്ങൾ ടിയാഗോ ഇവിയിൽ പ്രകടമാണ്. മുൻവശത്ത്, ഗ്രിൽ ടിഗോർ ഇവിക്ക് അനുസൃതമായി പരിഷ്കരിച്ചിട്ടുണ്ട്. ഗ്രില്ലിന്റെ ഭൂരിഭാഗവും ട്രൈ-ആരോ പാറ്റേണിംഗ് ഫീച്ചർ ചെയ്യുന്ന ഹെഡ്ലാമ്പുകൾക്ക് സമീപമുള്ള ഭാഗം ഉപയോഗിച്ച് അടച്ചിരിക്കുന്നു. ഒരു ഇവി ബാഡ്ജും ഗ്രില്ലിൽ സ്ഥാപിച്ചിട്ടുണ്ട്. ഗ്രില്ലിന് താഴെയുള്ള ട്രിം ഹൈലൈറ്റ് നീല നിറത്തിലാണ് നൽകിയിരിക്കുന്നത്.

ക്യാബിനിലേക്ക് വരുമ്പോൾ, അടിസ്ഥാന ലേഔട്ടിൽ സ്റ്റാൻഡേർഡ് ടിയാഗോയുമായി വലിയ വ്യത്യാസങ്ങളില്ല. നീല ഹൈലൈറ്റുകളും ടോപ്പ് വേരിയന്റുകളൽ നൽകിയ ലെതറെറ്റ് സീറ്റുകളും ഇവിയെ വ്യത്യസ്തമാക്കുന്നു. ടിയാഗോ ഇവിയിൽ ഓട്ടോ ക്ലൈമറ്റ് കൺട്രോളും ആൻഡ്രോയിഡ് ഓട്ടോയും ആപ്പിൾ കാർപ്ലേയും സ്റ്റാൻഡേർഡായി 7.0 ഇഞ്ച് ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റവും ലഭിക്കും. ക്രൂയിസ് കൺട്രോൾ (ടിയാഗോയിൽ ആദ്യം), ഓട്ടോ ഹെഡ്ലാമ്പുകൾ, റെയിൻ സെൻസിംഗ് വൈപ്പറുകൾ, തണുത്ത ഗ്ലൗസ് ബോക്സ്, ടയർ പ്രഷർ മോണിറ്ററിംഗ്, ഹർമൻ ഓഡിയോ സിസ്റ്റം എന്നിവയാണ് മറ്റ് സവിശേഷതകൾ.

എസ്‌യുവി, സെഡാൻ വിഭാഗങ്ങളിൽ ടാറ്റ മോട്ടോഴ്‌സ് ഇതിനകം തന്നെ ഇലക്ട്രിക് വാഹനങ്ങൾ പുറത്തിറക്കിയിട്ടുണ്ട്. എസ്‌യുവി സെഗ്‌മെന്റിലെ ടാറ്റ നെക്‌സോൺ ഇവിയാണ് ഇലക്ട്രിക് വിഭാഗത്തിൽ ടാറ്റക്ക് ആധിപത്യം നൽകിയത്. പിന്നീട് സെഡാൻ വിഭാഗത്തിൽ ടാറ്റ ടിഗോറിന്റെ ഇവി പതിപ്പും പുറത്തിറക്കി. ടിയാഗോ കൂടി വരുന്നതോടെ ഹാച്ച്ബാക്കിലും ഇലക്ട്രിക് കാർ അവതരിപ്പിച്ചിരിക്കുകയാണ് ടാറ്റാ മോട്ടോർസ്.