കെട്ടിയിട്ട് മര്‍ദനം, കോമ്പസ് കൊണ്ട് ശരീരമാകെ കുത്തി, മുറിവില്‍ ലോഷന്‍ ഒഴിച്ചു; നഴ്‌സിംഗ് കോളജിലെ ഞെട്ടിക്കുന്ന റാഗിങ്ങ് ദൃശ്യങ്ങള്‍ പുറത്ത്

കോട്ടയം| കോട്ടയം സര്‍ക്കാര്‍ നഴ്‌സിങ് കോളജിലെ ഞെട്ടിക്കുന്ന റാഗിങ്ങ് ദൃശ്യങ്ങള്‍ പുറത്ത്. കോളജ് ഹോസ്റ്റലില്‍ പരാതിക്കാരനായ ഒന്നാംവര്‍ഷ വിദ്യാര്‍ത്ഥിയെ കയ്യും കാലും കെട്ടിയിട്ട് മൂന്നാം വര്‍ഷ വിദ്യാര്‍ത്ഥികള്‍ ഉപദ്രവിക്കുന്ന ദൃശ്യങ്ങളാണ് പുറത്തായത്. കോമ്പസ് ഉപയോഗിച്ച് ശരീരമാകെ കുത്തുന്നതും മുറിവില്‍ ലോഷന്‍ ഒഴിക്കുന്നതും സ്വകാര്യഭാഗത്ത് പരുക്കേല്‍പ്പിക്കുന്നതും ദൃശ്യങ്ങളിലുണ്ട്.

സംഭവത്തില്‍ ഇന്നലെ അഞ്ച് വിദ്യാര്‍ത്ഥികളുടെ അറസ്റ്റ് പോലീസ് രേഖപ്പെടുത്തിയിരുന്നു. കോട്ടയം മൂന്നിലവ് സ്വദേശി സാമുവല്‍, വയനാട് നടവയല്‍ സ്വദേശി ജീവ, മലപ്പുറം മഞ്ചേരി സ്വദേശി റിജില്‍ ജിത്ത്, മലപ്പുറം വണ്ടൂര്‍ സ്വദേശി രാഹുല്‍ രാജ്, കോട്ടയം കോരുത്തോട് സ്വദേശി വിവേക് എന്‍പി എന്നിവരെയാണ് പോലീസ് ഇന്നലെ അറസ്റ്റ് ചെയ്തത്. അഞ്ച് പേരെയും കോളജില്‍ നിന്ന് സസ്‌പെന്റ് ചെയ്തിട്ടുമുണ്ട്. ആന്റി റാഗിങ് നിയമപ്രകാരം അന്വേഷണം നടത്തിയ ശേഷമാണ് കോളജ് പ്രിന്‍സിപ്പാള്‍ നടപടിയെടുത്തത്.

ഒന്നാംവര്‍ഷ വിദ്യാര്‍ത്ഥികളെ മൂന്നാം വര്‍ഷ വിദ്യാര്‍ത്ഥികള്‍ മൂന്ന് മാസത്തോളം റാഗ് ചെയ്‌തെന്നാണ് പരാതി. സംഭവത്തില്‍ കോളജ് ഹോസ്റ്റലിലെ കൂടുതല്‍ വിദ്യാര്‍ത്ഥികളില്‍ നിന്നും അധ്യാപകരില്‍ നിന്നും കൂടുതല്‍ വിവരങ്ങള്‍ ശേഖരിക്കാനാണ് അന്വേഷണ സംഘത്തിന്റെ തീരുമാനം. വിഷയത്തില്‍ സമഗ്ര അന്വേഷണം നടത്താന്‍ മെഡിക്കല്‍ വിദ്യാഭ്യാസ വകുപ്പും പ്രത്യേക സംഘത്തെ നിയോഗിച്ചിട്ടുണ്ട്. അതിവേഗം റിപ്പോര്‍ട്ട് സര്‍പ്പിക്കാനാണ് മെഡിക്കല്‍ വിദ്യാഭ്യാസ ഡയറക്ടറുടെ നിര്‍ദേശം.