കിണറ്റില്‍ വീണ പുലിയെ മയക്കുവെടിവെയ്ക്കാതെ പുറത്തെത്തിച്ചു

പാലക്കാട് | നെല്ലിയാമ്പതിയില്‍ കിണറ്റില്‍ വീണ പുലിയെ മയക്കുവെടിവെയ്ക്കാതെ പുറത്തെത്തിച്ചു. ആറര മണിക്കൂര്‍ നീണ്ട ദൗത്യത്തിന് പിന്നാലെയാണ് വനം വകുപ്പ് ഉദ്യോഗസ്ഥര്‍ പുലിയെ കൂട്ടില്‍കയറ്റി പുറത്തെത്തിച്ചത്.

ഇന്നലെ രാത്രിയോടെയാണ് പുലയമ്പാറ സ്വദേശി ജോസിന്റെ വീട്ടിലെ കിണറ്റില്‍ പുലി വീണത്. തുടര്‍ന്ന് വനംവകുപ്പിനെ വിവരം അറിയിക്കുകയായിരുന്നു. വനംവകുപ്പ് ഉദ്യോഗസ്ഥര്‍ കിണറ്റിലേക്കിറക്കുന്നതിനായി കൂട് സ്ഥലത്തെത്തിച്ചു. ഡി എഫ് ഒയും എം എല്‍ എയും ഉള്‍പ്പെടെയുള്ളവരും സ്ഥലത്തെത്തി. പുലിയെ കൂട്ടില്‍ കയറ്റി പുറത്തെത്തിക്കാനുള്ള സാധ്യത അടഞ്ഞാല്‍ മയക്കുവെടിവെച്ച് പുറത്തെത്തിക്കാനും തീരുമാനിച്ചിരുന്നു.

ഇതിനായി വെറ്ററിനറി ഡോക്ടര്‍ ഡേവിഡ് എബ്രഹാമും സ്ഥലത്തേക്ക് പുറപ്പെട്ടിരുന്നു. ഇതിനിടെ അര്‍ധരാത്രി 12.20ഓടെ പുലി സ്വയം കൂട്ടില്‍ കയറി. തുടര്‍ന്നു പുറത്തെത്തിക്കുകയായിരുന്നു. ആറര മണിക്കൂര്‍ നീണ്ട രക്ഷാദൗത്യത്തിനൊടുവിലാണ് പുലിയെ പുറത്തെത്തിക്കാനായത്. പുലിയുടെ ആരോഗ്യ നില പരിശോധിച്ച ശേഷം കാടിനുള്ളിലേക്ക് വിടാനാണ് വനംവകുപ്പ് തീരുമാനം.