കൊച്ചിയില്‍ ട്രാന്‍സ് വുമണിന് ഇരുമ്പ് വടി കൊണ്ട് ക്രൂരമര്‍ദനം; പ്രതിയ്ക്കായി അന്വേഷണം ആരംഭിച്ച് പോലീസ്

കൊച്ചി|കൊച്ചിയില്‍ ട്രാന്‍സ് വുമണിന് ഇരുമ്പ് വടി കൊണ്ട് ക്രൂരമര്‍ദനം. സംഭവത്തില്‍ ട്രാന്‍സ് ജെന്‍ഡേര്‍സ് ആക്ട് പ്രകാരം പോലീസ് കേസെടുത്തു. വെളളിയാഴ്ച പുലര്‍ച്ചെ രണ്ട് മണിയോടെ പാലാരിവട്ടം മെട്രോ സ്റ്റേഷന് സമീപമാണ് സംഭവമുണ്ടായത്. കാക്കനാട് സ്വദേശിയായ ഇവര്‍ സുഹൃത്തിനെ കാത്തിരിക്കെയാണ് ആക്രമിക്കപ്പെട്ടത്.

ട്രാന്‍സ് വുമണിനെ ഒരാള്‍ അസഭ്യം പറയുകയും ഇരുമ്പ് വടി കൊണ്ട് മര്‍ദിക്കുകയുമായിരുന്നു. മര്‍ദനത്തില്‍ കാലിനും കൈവിരലിനും പരുക്കേറ്റു. ഇവര്‍ ഓടിരക്ഷപ്പെടാന്‍ ശ്രമിക്കുന്ന ദൃശ്യം പുറത്തുവന്നിട്ടുണ്ട്. തുടര്‍ന്ന് ട്രാന്‍സ് വുമണ്‍ പാലാരിവട്ടം പോലീസ് സ്റ്റേഷനില്‍ പരാതി നല്‍കി. ആക്രമിച്ചത് ആരാണെന്ന് വ്യക്തമായിട്ടില്ല. പാലാരിവട്ടം പോലീസ് കേസെടുത്ത് അന്വേഷണം ആരംഭിച്ചു.