മധ്യപ്രദേശില്‍ ട്രക്ക് വാനില്‍ ഇടിച്ച് അപകടം; അഞ്ചു മരണം, 20 പേര്‍ക്ക് പരുക്ക്

ഭിന്ദ്| മധ്യപ്രദേശിലെ ഭിന്ദ് ജില്ലയില്‍ ട്രക്ക് വാനില്‍ ഇടിച്ച് അപകടം. അപകടത്തില്‍ അഞ്ചുപേര്‍ മരിച്ചു. 20 പേര്‍ക്ക് പരുക്കേറ്റു. ഇന്ന് പുലര്‍ച്ചെ അഞ്ച് മണിയോടെയാണ് അപകടമുണ്ടായത്. ജവഹര്‍പുര ഗ്രാമത്തിന് സമീപം വിവാഹ ചടങ്ങില്‍ പങ്കെടുത്ത് മടങ്ങുമ്പോഴായിരുന്നു അപകടം.

മരിച്ചവരില്‍ മൂന്നുപേര്‍ സ്ത്രീകളാണ്. മൂന്ന് പേര്‍ സംഭവസ്ഥലത്ത് വെച്ചും മറ്റ് രണ്ട് പേര്‍ ആശുപത്രിയില്‍ വെച്ചുമാണ് മരിച്ചത്. പരുക്കേറ്റവരില്‍ 12 പേരെ ചികിത്സയ്ക്കായി ഗ്വാളിയറിലേക്ക് കൊണ്ടു പോയി. മറ്റുള്ളവര്‍ ഭിന്ദ് ജില്ലാ ആശുപത്രിയില്‍ ചികിത്സയിലാണ്.

അപകടത്തില്‍ മരിച്ചവരുടെ കുടുംബങ്ങള്‍ക്ക് മധ്യപ്രദേശ് മുഖ്യമന്ത്രി ധനസഹായം പ്രഖ്യാപിച്ചു. മുഖ്യമന്ത്രിയുടെ വോളന്ററി ഗ്രാന്റില്‍ നിന്ന് നാല് ലക്ഷം രൂപയാണ് നല്‍കുക. ഗുരുതരമായി പരുക്കേറ്റവര്‍ക്ക് ഒരു ലക്ഷം രൂപ വീതവും നിസാര പരുക്കേറ്റവര്‍ക്ക് 50,000 രൂപ വീതവും ധനസഹായം നല്‍കുമെന്ന് മുഖ്യമന്ത്രി അറിയിച്ചു.