കോട്ടയത്ത് ബൈക്കും കാറും കൂട്ടിയിടിച്ച് അപകടം; രണ്ട് മരണം

കോട്ടയം| കോട്ടയം വൈക്കത്ത് ബൈക്കും കാറും കൂട്ടിയിടിച്ച് അപകടം. അപകടത്തില്‍ ബൈക്ക് യാത്രക്കാരായ രണ്ട് യുവാക്കള്‍ മരിച്ചു. വൈക്കം തോട്ടകത്ത് ഇന്നലെ രാത്രി പത്തരയോടെയാണ് അപകടമുണ്ടായത്. ബൈക്ക് യാത്രക്കാരായ കുടവെച്ചൂര്‍ സ്വദേശി നിധീഷ് (35 ), പൂച്ചാക്കല്‍ സ്വദേശി അക്ഷയ് (19) എന്നിവരാണ് മരിച്ചത്.

ബൈക്കില്‍ മൂന്ന് പേരുണ്ടായിരുന്നു. യുവാക്കള്‍ക്കൊപ്പം സഞ്ചരിച്ചിരുന്ന തോട്ടകം സ്വദേശി ആദിദേവിനെ പരുക്കുകളുടെ ആശുപത്രിയില്‍ പ്രവേശിപ്പിച്ചു. കാര്‍ യാത്രക്കാരന് പരുക്കില്ല. കാറിടിച്ചതോടെ ബൈക്ക് യാത്രക്കാര്‍ റോഡിലേക്ക് തെറിച്ചുവീഴുകയായിരുന്നുവെന്നാണ് സൂചന. നിധീഷിന്റെയും അക്ഷയ്‌യുടെയും മൃതദേഹം കോട്ടയം മെഡിക്കല്‍ കോളജ് ആശുപത്രിയിലേക്ക് മാറ്റി. നടപടികള്‍ക്കുശേഷം ബന്ധുക്കള്‍ക്ക് വിട്ടു നല്‍കും.