കോഴിക്കോട് ഇരു സംഘങ്ങള്‍ ഏറ്റ്മുട്ടി; ജീപ്പിന് നേരെ പെട്രോള്‍ ബോംബെറിഞ്ഞു

കോഴിക്കോട് |  കോഴിക്കോട് മെഡിക്കല്‍ കോളജിന് സമീപം നിര്‍ത്തിയിട്ടിരുന്ന ജീപ്പിന് നേര്‍ക്ക് ബോംബേറ്. ഇരു സംഘങ്ങള്‍ തമ്മിലുള്ള ഏറ്റുമുട്ടലിനിടെയാണ് പെട്രോള്‍ ബോംബേറുണ്ടായത്. പുലര്‍ച്ചെ രണ്ടുമണിയോടെ മെഡിക്കല്‍ കോളജ് കാഷ്വാലിറ്റിക്ക് മുമ്പിലാണ് സംഭവം. പെട്രോള്‍ ബോംബ് എറിഞ്ഞതിനെത്തുടര്‍ന്ന് ജീപ്പിന് തീപ്പിടിച്ചെങ്കിലും നാട്ടുകാര്‍ ഇടപെട്ട് തീ  അണക്കുകയായിരുന്നു.

കുറ്റിക്കാട്ടൂരില്‍ ഇന്നലെ രാത്രി രണ്ടു സംഘങ്ങള്‍ തമ്മില്‍ ഏറ്റുമുട്ടല്‍ നടന്നിരുന്നു. ഇതേത്തുടര്‍ന്ന് രണ്ടുപേര്‍ മെഡിക്കല്‍ കോളജ് ആശുപത്രിയില്‍ ചികിത്സ തേടിയിരുന്നു. പോലീസ് എത്തിയപ്പോള്‍ പ്രതികളെ ചൂണ്ടിക്കാണിച്ചതിനെച്ചൊല്ലിയാണ് വീണ്ടും ഏറ്റുമുട്ടലുണ്ടായത്.