ഈദ് ആഘോഷപ്പൊലിമയിൽ യു എ ഇ

ദുബൈ | ഇന്ന് ഈദുൽ ഫിത്വർ. ഇരുപത്തൊമ്പത് നാൾ നീണ്ട നോമ്പുകാലം സമ്മാനിച്ച അതുല്യമായ ആത്മീയ ഉത്കർഷത്തിന്റെയും സഹനത്തിന്റെയും ചൈതന്യത്തിൽ നിന്നുള്ള വെളിച്ചവുമായാണ് വിശ്വാസികൾ ഈദ് ആഘോഷിക്കുന്നത്.

യു എ ഇ മാസപ്പിറവി നിർണയ കമ്മിറ്റി ഇന്നലെ അബൂദബി അൽ ഹുസ്‌നിൽ യോഗം ചേർന്നാണ് ശവ്വാൽ പിറവി പ്രഖ്യാപിച്ചത്. ഒമാൻ ഒഴികെയുള്ള ഗൾഫ് രാജ്യങ്ങൾ ഇന്ന് ഈദ് ആഘോഷിക്കും.
ചെയ്തുപോയ പാപങ്ങൾ കഴുകിക്കളയാൻ നാഥനിലേക്ക് കരങ്ങൾ നീട്ടി പ്രാർഥനയുമായി കഴിഞ്ഞുകൂടിയ വിശ്വാസികൾക്ക് ആഘോഷത്തിന്റെ നിമിഷങ്ങളാണ് കൈവന്നിരിക്കുന്നത്. ഈദ് ആഘോഷത്തിന് രാജ്യവ്യാപകമായി വിപുലമായ ഒരുക്കങ്ങളാണ് നടന്നത്. പെരുന്നാൾ നിസ്‌കാരത്തിന്നായി പള്ളികളും ഈദ് മുസല്ലകളും ഒരുങ്ങി. അതിരാവിലെ ഈദ് നിസ്‌കാരത്തിന്നായി വിശ്വാസികൾ കൂട്ടമായി ഇവിടങ്ങളിലെത്തി. ഫിത്ർ സകാത്ത് എന്ന നിർബന്ധദാനം നിർവഹിച്ച ശേഷമാണ് നിസ്‌കാരത്തിന്നായി എത്തിയത്.

പരസ്പര സഹകരണത്തിന്റെ പാലങ്ങൾ തീർക്കുന്ന ഇഫ്താർ കൂട്ടായ്മകളിൽ പങ്കെടുത്ത് സ്നേഹത്തിന്റെയും നന്മയുടെയും ഊർജസ്വലമായ പ്രസരണം നടത്തിയാണ് പ്രവാസികൾ അടക്കമുള്ള സമൂഹം ഈദിനായി ഒരുങ്ങുന്നത്.

ഈദ് ആഘോഷവേളയിൽ അടിയന്തര വൈദ്യസഹായം ആവശ്യമായ ഗുരുതരമായ കേസുകൾ ഇല്ലാതാക്കാനും അപകട സാധ്യത ലഘൂകരിക്കുന്നതിനും ഏതാനും സുരക്ഷാ നുറുങ്ങുകൾ അധികൃതർ പങ്കുവെച്ചു.

ഭക്ഷ്യസുരക്ഷ: ഭക്ഷ്യജന്യ രോഗങ്ങൾ തടയുന്നതിന് എല്ലാ ഭക്ഷണവും ശരിയായി പാകം ചെയ്യുകയും സൂക്ഷിക്കുകയും വൃത്തിയായി കൈകാര്യം ചെയ്യുകയും ചെയ്യുക. ദീർഘനേരം പുറത്തുവെച്ചിരിക്കുന്ന ഭക്ഷണം കഴിക്കുന്നത് ഒഴിവാക്കുക.

ട്രാഫിക് സുരക്ഷ: വാഹനമോടിക്കുമ്പോൾ റോഡുകളിൽ തിരക്ക് അനുഭവപ്പെടുന്ന സമയങ്ങളിൽ ജാഗ്രത പാലിക്കുക. അമിതവേഗതയോ അശ്രദ്ധമായ ഡ്രൈവിംഗ് പെരുമാറ്റമോ ഒഴിവാക്കുക.

ജലാംശം: ദിവസം മുഴുവൻ, പ്രത്യേകിച്ച് ചൂടുള്ള കാലാവസ്ഥയിൽ ധാരാളം വെള്ളം കുടിക്കുക. പഞ്ചസാരയോ കഫീൻ അടങ്ങിയ പാനീയങ്ങളോ അമിതമായി ഉപയോഗിക്കുന്നത് ഒഴിവാക്കുക.

പടക്കങ്ങൾ: യു എ ഇയിൽ പടക്കങ്ങൾ വാങ്ങുന്നതും ഉപയോഗിക്കുന്നതും നിയമവിരുദ്ധമാണ്. പടക്കങ്ങൾ പൂർണമായും ഒഴിവാക്കണം.

സൈബർ ജാഗ്രത വേണം: ഈദ് അൽ ഫിത്വർ അവധിക്കാലത്ത് സൈബർ ആക്രമണ സാധ്യത കൂടുതലായതിനാൽ കൂടുതൽ മുൻകരുതലുകൾ എടുക്കണമെന്ന് സൈബർ സുരക്ഷാ കൗൺസിൽ അഭ്യർഥിച്ചു. വ്യക്തിഗത, സ്ഥാപന ഡാറ്റ സുരക്ഷ ഉറപ്പാക്കാൻ സംരക്ഷണ നടപടികൾ വർധിപ്പിക്കണം. ലഭിക്കുന്ന ഇമെയിലുകൾ കൈകാര്യം ചെയ്യുമ്പോൾ ജാഗ്രത പാലിക്കുക. ലിങ്കുകൾ തുറക്കുമ്പോൾ അവയുടെ ആധികാരികത ഉറപ്പാക്കുക. സംശയാസ്പദമായ ലിങ്കുകൾ അല്ലെങ്കിൽ അജ്ഞാത സന്ദേശങ്ങൾ പങ്കിടുന്നത് ഒഴിവാക്കുക തുടങ്ങിയവ ശ്രദ്ധിക്കേണ്ടതുണ്ട്.

ഈദ് അൽ ഫിത്വർ അവധിക്കാലത്ത് സുരക്ഷ ഒരുക്കാൻ അബൂദബിയിൽ അബൂദബി പോലീസും സിവിൽ ഡിഫൻസ് അതോറിറ്റിയും മാർഗനിർദേശങ്ങൾ പുറത്തിറക്കി. മുൻകരുതൽ നടപടികൾ പാലിക്കാൻ അധികൃതർ പൊതുജനങ്ങളോട് അഭ്യർഥിച്ചു.ഗതാഗത നിയമങ്ങൾ പാലിക്കൽ, വേഗത കുറക്കൽ, അടിയന്തര വാഹനങ്ങൾക്ക് വഴിമാറിക്കൊടുക്കൽ എന്നിവ ഉൾപ്പെടെയുള്ള സുരക്ഷിതമായ ഡ്രൈവിംഗ് രീതികൾക്ക് മാർഗനിർദേശങ്ങൾ ഊന്നൽ നൽകുന്നു. സ്റ്റണ്ട് ഉൾപ്പെടെയുള്ള അശ്രദ്ധമായ ഡ്രൈവിംഗ് ഒഴിവാക്കണം.

ടക്കങ്ങൾ ഉപയോഗിക്കുന്നതിന് കടുത്ത നിയന്ത്രണം ഉണ്ട്. കുട്ടികൾ പ്രധാന റോഡുകളിൽ നിന്ന് അകന്നു നിൽക്കുന്നുണ്ടെന്ന് ഉറപ്പാക്കാനും തെരുവുകൾ മുറിച്ചുകടക്കുമ്പോൾ മേൽനോട്ടം വഹിക്കുകയും ചെയ്യും.ഉയർന്ന സുരക്ഷാ മാനദണ്ഡങ്ങൾ പാലിക്കുന്ന ചാർജറുകൾ, എക്സ്റ്റൻഷൻ കേബിളുകൾ, ഇലക്ട്രോണിക് ഉപകരണങ്ങൾ എന്നിവ മാത്രമേ ഉപയോഗിക്കാവൂ.ഈദ് ആഘോഷ വേളയിൽ അടിയന്തര തയ്യാറെടുപ്പ് വർധിപ്പിക്കുന്നതിനും സുഗമമായ ഗതാഗതം നിലനിർത്തുന്നതിനും പൊതു സുരക്ഷ ഉറപ്പാക്കുന്നതിനുമുള്ള നിരന്തരമായ ശ്രമങ്ങളുടെ ഭാഗമാണ്.

ഈദിന്റെ ആദ്യ മൂന്ന് ദിവസങ്ങളിൽ ഷാർജയിൽ സൗജന്യ പൊതു പാർക്കിംഗ് ലഭിക്കും. എന്നാൽ പൊതു അവധി ദിവസങ്ങൾ ഉൾപ്പെടെ വർഷം മുഴുവനും സജീവമായി തുടരുന്ന നീല അടയാളങ്ങളുള്ള പെയ്ഡ് സോണുകൾ ഇതിൽ പെടില്ല. ഷാർജ മുനിസിപ്പാലിറ്റിയുടെ പരിശോധനാ സംഘങ്ങൾ നിയമലംഘനങ്ങൾ നിരീക്ഷിക്കുകയും പാർക്കിംഗ് സ്ഥലങ്ങൾ ദുരുപയോഗം ചെയ്യുന്നത് തടയുകയും ചെയ്യും.

ഷാർജ റോഡ്സ് ആൻഡ് ട്രാൻസ്പോർട്ട് അതോറിറ്റി ഈദ് അവധിക്കാലത്ത് 7,000-ത്തിലധികം ഇന്റർസിറ്റി ബസ് ട്രിപ്പുകൾ നടത്തും. തിരക്കേറിയ സമയങ്ങളിൽ കാത്തിരിപ്പ് സമയം അഞ്ച് മിനിറ്റായി കുറക്കും. സാധാരണ ദിവസങ്ങളിൽ ഇത് 45 മിനിറ്റായിരുന്നു.കൂടാതെ, 104 ബസുകൾ ഉപയോഗിച്ച് പ്രതിദിനം 1,144 ട്രിപ്പുകൾ നടത്തും. 12 പബ്ലിക് ബസ് റൂട്ടുകളിൽ 546 സ്റ്റോപ്പുകളിൽ ഇതിന്റെ സേവനമുണ്ടാവും. മസ്‌കത്തിലേക്കുള്ള റൂട്ട് 203 തുടരും.ഷാർജയ്ക്കും ദുബൈക്കും ഇടയിൽ പ്രതിദിനം എട്ട് സമുദ്ര യാത്ര നടത്തുന്നുണ്ട്.

ബാർബർഷോപ്പുകൾ, ബ്യൂട്ടി സലൂണുകൾ തുടങ്ങിയ ഭക്ഷണ സ്ഥാപനങ്ങളും വ്യക്തിഗത പരിചരണ ബിസിനസുകളും നിരീക്ഷിക്കുന്നതിനായി മുനിസിപ്പാലിറ്റി 134 ഇൻസ്‌പെക്ടർമാരെ വിന്യസിച്ചിട്ടുണ്ട്. പരിശോധനകൾ 24 മണിക്കൂറും നടക്കും.പൊതു സ്ഥലങ്ങളിൽ 186 ഇൻസ്‌പെക്ടർമാർ നിഷേധാത്മക പെരുമാറ്റങ്ങൾ നിരീക്ഷിക്കും.ഹരിത ഇടങ്ങൾ അടക്കമുള്ളവയിൽ മാർഗനിർദേശങ്ങൾ പാലിക്കുന്നുണ്ടെന്ന് ഇവർ ഉറപ്പാക്കും. ബീച്ചുകളിൽ ലൈഫ് ഗാർഡുകളുടെ സാന്നിധ്യം വർധിപ്പിക്കും.