തുരങ്കത്തില്‍ കുടുങ്ങിയ പുലിയെ പിടികൂടാനായില്ല

കാസര്‍ഗോഡ് | കൊളത്തൂരില്‍ തോട്ടത്തിലെ തുരങ്കത്തില്‍ കുടുങ്ങിയ പുലിയെ പിടികൂടാനായില്ല. മയക്കുവെടി വയ്ക്കാനുള്ള ശ്രമത്തിനിടെ പുലി ചാടിപ്പോയി.

വയനാട്ടില്‍ നിന്ന് എത്തിയ വനംവകുപ്പ് സംഘം മേഖലയില്‍ തുടരുന്നു. വയനാട്ടില്‍ നിന്നെത്തിയ ഡോക്ടര്‍മാര്‍ ഉള്‍പ്പെടെയുള്ള സംഘം പുലര്‍ച്ചെ മൂന്ന് മണിയോടെയാണ് മയക്കുവെടി വച്ചത്. പുലിയ്ക്ക് മയക്കുവെടിയേറ്റതായും സംശയമുണ്ട്. പ്രദേശത്ത് നിലവില്‍ കനത്ത മൂടല്‍ മഞ്ഞുണ്ട്.

ചാളക്കാട് മടന്തക്കോട് കവുങ്ങിന്‍ തോട്ടത്തിന് സമീപമുള്ള തുരങ്കത്തിലാണ് പുലിയെ കണ്ടെത്തിയത്. തുരങ്കത്തിനുള്ളില്‍ നിന്ന് ഗര്‍ജനം കേട്ട് സ്ഥലത്തെത്തിയ പ്രദേശവാസിയാണ് പുലിയെ കണ്ടത്. വനം വകുപ്പ് അധികൃതര്‍ തുരങ്കത്തില്‍ വല വെച്ച് മൂടിയശേഷമാണ് മയക്കുവെടി വച്ചതെങ്കിലും പുലി രക്ഷപ്പെട്ടു. പ്രദേശത്ത് ജനവാസ കേന്ദ്രങ്ങളില്‍ നിരന്തരം പുലി സാന്നിധ്യം ഉണ്ടാവാറുണ്ടെന്നു നാട്ടുകാര്‍ പറഞ്ഞു.