ഭീകരവാദത്തിനെതിരെ ഒറ്റക്കെട്ട്, സര്‍ക്കാര്‍ നടപടികള്‍ക്ക് പൂര്‍ണ പിന്തുണ: സര്‍വകക്ഷി യോഗം

ശ്രീനഗര്‍ | ജമ്മു കശ്മീരിലെ പഹല്‍ഗാമില്‍ 26 പേരുടെ മരണത്തിനിടയാക്കിയ ആക്രമണത്തിന്റെ പശ്ചാത്തലത്തില്‍ കേന്ദ്രം ഭീകരവാദത്തിനെതിരെ പ്രഖ്യാപിച്ച നടപടികള്‍ക്ക് പൂര്‍ണ പിന്തുണയുമായി ശ്രീനഗറില്‍ ചേര്‍ന്ന സര്‍വകക്ഷി യോഗം സമാപിച്ചു. ഭീകരവാദത്തിനെതിരെ ഒറ്റക്കെട്ടായി പ്രവര്‍ത്തിക്കുമെന്ന പ്രമേയം യോഗത്തില്‍ പാസാക്കി. വിഷയത്തില്‍ പ്രത്യേക നിയമസഭാ സമ്മേളനം ചേരാനും യോഗം തീരുമാനിച്ചു. ഭീകരാക്രമണം തടയാന്‍ ശ്രമിക്കുന്നതിനിടെ കൊല്ലപ്പെട്ട കശ്മീര്‍ സ്വദേശി സെയ്ദ് ആദില്‍ ഹുസൈന്‍ ഷായ്ക്ക് സര്‍വകക്ഷി യോഗം ആദരമര്‍പ്പിച്ചു.

സംസ്ഥാനത്തിന് പുറത്തുള്ള ജമ്മു കശ്മീര്‍ സ്വദേശികളുടെ സുരക്ഷ ഉറപ്പാക്കാന്‍ എല്ലാ സര്‍ക്കാരുകളും നടപടിയെടുക്കണമെന്ന ആവശ്യം യോഗത്തില്‍ ഉയര്‍ന്നു. കശ്മീരിലെ സമാധാനവും ഐക്യവും തര്‍ക്കുക ലക്ഷ്യം വച്ചുള്ള ക്രൂരമായ ആക്രമണമാണ് നടന്നതെന്നും മരിച്ചവരുടെ കുടുംബാംഗങ്ങളുടെ ദുഃഖത്തില്‍ പങ്കുചേരുന്നുവെന്നും സര്‍വകക്ഷി യോഗത്തിനു ശേഷമിറക്കിയ പ്രസ്താവനയില്‍ പറഞ്ഞു. ഭീകരാക്രമണത്തിനെതിരെ കശ്മീര്‍ ഒറ്റക്കെട്ടായി ഉയര്‍ന്ന പ്രതിഷേധത്തെയും സര്‍വകക്ഷി യോഗം അഭിനന്ദിച്ചു.

ജമ്മു കശ്മീര്‍ മുഖ്യമന്ത്രി ഒമര്‍ അബ്ദുല്ലയുടെ നേതൃത്വത്തില്‍ ചേര്‍ന്ന യോഗത്തില്‍ രാജ്യത്തെ പ്രധാനപ്പെട്ട എല്ലാ രാഷ്ട്രീയ കക്ഷികളുടെയും നേതാക്കള്‍ പങ്കെടുത്തു. ഐക്യത്തോടെ മുന്നോട്ട് പോകാന്‍ രാഷ്ട്രീയ പാര്‍ട്ടികള്‍ക്ക് കൂട്ടായ ഉത്തരവാദിത്വം ഉണ്ടെന്നും രാഷ്ട്രീയം മറന്ന് എല്ലാവരും സഹകരിക്കണമെന്നും ഒമര്‍ അബ്ദുല്ല ആവശ്യപ്പെട്ടു. പാക്കിസ്ഥാനെ വിജയിക്കാന്‍ അനുവദിക്കരുതെന്നും വിനോദ സഞ്ചാരികള്‍ ഇനിയും കശ്മീരിലേക്ക് വരണമെന്നും മുന്‍ മുഖ്യമന്ത്രിയും നാഷണല്‍ കോണ്‍ഫറന്‍സ് അധ്യക്ഷനുമായ ഫാറൂഖ് അബ്ദുല്ല ആഹ്വാനം ചെയ്തു.