ഹൂതി ബോട്ടുകള്‍ക്കു നേരെ യു എസ് ആക്രമണം; 10 ഹൂതികള്‍ കൊല്ലപ്പെട്ടു

സന | യമനില്‍ അമേരിക്ക നടത്തിയ ആക്രമണത്തില്‍ 10 ഹൂതികള്‍ കൊല്ലപ്പെട്ടു. ചെങ്കടലില്‍ മൂന്ന് ഹൂതി ബോട്ടുകള്‍ക്കു നേരെയാണ് ആക്രമണം നടന്നത്.

സുരക്ഷയും സ്ഥിരതയും സ്ഥാപിക്കുന്നതിനും സമുദ്ര യാനങ്ങളെ സംരക്ഷിക്കുന്നിതനുമായുള്ള ദൗത്യത്തില്‍ ഏര്‍പ്പെട്ട ബോട്ടുകളാണ് ആക്രമണത്തിന് ഇരയായതെന്ന് ഹൂതികള്‍ പുറത്തിറക്കിയ പ്രസ്താവനയില്‍ പറഞ്ഞു. ചെങ്കടലിലൂടെ ഫലസ്തീന്‍ അധിനിവേശ പ്രദേശങ്ങളിലേക്ക് കടക്കാനുള്ള ഇസ്‌റാഈലിന്റെ ശ്രമങ്ങള്‍ തടയുന്ന ഉത്തരവാദിത്തവും ഈ ബോട്ടുകള്‍ നിര്‍വഹിച്ചു വരികയായിരുന്നു.

ഹൂതി വിമതരുടെ മൂന്ന് ബോട്ടുകള്‍ മുക്കിയതായി യു എസ് സൈന്യം നേരത്തെ വ്യക്തമാക്കിയിരുന്നു. ഇറാന്റെ പിന്തുണയുള്ള ഹൂതികളുടെ ചെറിയ ബോട്ടുകളെ തങ്ങളുടെ യുദ്ധക്കപ്പലുകളായ ഐസന്‍ഹോവര്‍, ഗ്രേവ്‌ലി എന്നിവയില്‍ നിന്ന് പറന്നുയര്‍ന്ന ഹെലികോപ്ടറുകള്‍ ബോംബിട്ട് തകര്‍ക്കുകയായിരുന്നു.