വടക്കഞ്ചേരി അപകടം: ഡ്രൈവറെ അറസ്റ്റ് ചെയ്തു; ടൂറിസ്റ്റ് ബസുകളില്‍ കര്‍ശന പരിശോധന

വടക്കഞ്ചേരി | വടക്കഞ്ചേരി അപകടത്തിനിടയാക്കിയ ബസിന്റെ ഡ്രൈവര്‍ ജോമോന്റെ അറസ്റ്റ് രേഖപ്പെടുത്തി. ജോമോനെതിരെ മനപ്പൂര്‍വമല്ലാത്ത നരഹത്യക്ക് കേസെടുത്തിട്ടുണ്ട്. ഡ്രൈവര്‍ക്കെതിരെ കൂടുതല്‍ നടപടികളെടുക്കും. ബസിന്റെ പെര്‍മിറ്റും ലൈസന്‍സും റദ്ദാക്കുമെന്ന് ട്രാന്‍സ്‌പോര്‍ട്ട് കമ്മീഷണര്‍ എസ് ശ്രീജിത്ത് അറിയിച്ചു.

അപകടത്തിന്റെ പശ്ചാത്തലത്തില്‍ ടൂറിസ്റ്റ് ബസുകളില്‍ മോട്ടോര്‍ വാഹന വകുപ്പ് കര്‍ശന പരിശോധന ആരംഭിച്ചു. നിയമം ലംഘിച്ച ബസുകളുടെ വിനോദയാത്ര തടഞ്ഞു. സംസ്ഥാനത്ത് പലയിടത്തും ടൂറിസ്റ്റ് ബസുകളുടെ യാത്ര വിലക്കി. വേഗപ്പൂട്ടില്ലാത്തവ, ആഡംബര ലൈറ്റുകള്‍, നിരോധിക്കപ്പെട്ട ഹോണുകള്‍ എന്നിങ്ങനെ നിയമം ലംഘിച്ച് ഓടിയ ബസുകളാണ് തടഞ്ഞത്.

വിനോദയാത്ര പോകുന്നതില്‍ കര്‍ശന നിര്‍ദേശങ്ങള്‍ ഇന്നലെ വിദ്യാഭ്യാസ വകുപ്പ് പുറപ്പെടുവിച്ചിരുന്നു. രാത്രിയില്‍ വിനോദയാത്ര ഒഴിവാക്കണം. രാത്രി ഒമ്പത് മുതല്‍ രാവിലെ ആറ് വരെ യാത്ര പാടില്ല. ടൂര്‍ വാഹനം ഉപയോഗിക്കുന്നതിലും കര്‍ശന നിര്‍ദേശങ്ങളുണ്ട്.