എസ് എഫ് ഐ ലഹരി വ്യാപനത്തിന്റെ കണ്ണിയായി മാറിയെന്ന് വി ഡി സതീശന്‍

കാസര്‍കോട് | സംസ്ഥാനത്തെ ലഹരി വ്യാപനത്തിന്റെ കണ്ണിയായി എസ് എഫ് ഐ മാറിയെന്ന് പ്രതിപക്ഷ നേതാവ് വി ഡി സതീശന്‍. തിരുവനന്തപുരം യൂനിവേഴ്സിറ്റി കോളജിലും കളമശേരിയില്‍ പോളി ടെക്നിക് കോളജിലും എവിടെ മയക്കുമരുന്ന് പിടിച്ചാലും എസ്എഫ് ഐ പ്രവര്‍ത്തകരുണ്ടാകും. എല്ലാ സാമൂഹിക വിരുദ്ധ പ്രവര്‍ത്തനങ്ങളിലും ഈ സംഘടനയുടെ പേരുണ്ട്. എസ് എഫ് ഐ കേരളത്തില്‍ ഒരു സാമൂഹിക പ്രശ്നമായി മാറിയിരിക്കുകയാണ്. സി പി എം ഇടപെട്ട് സംഘടന പിരിച്ചുവിടണമെന്നും സതീശന്‍ ആവശ്യപ്പെട്ടു.

എസ് എഫ് ഐ വിദ്യാര്‍ഥികളെ കയറൂരി വിട്ടിരിക്കുകയാണ്. ഇതുവഴി പുതുതലമുറയെ ക്രിമിനലുകളാക്കി മാറ്റുകയാണ് സി പി എം ചെയ്യുന്നത്. സ്വന്തം സംഘടനയില്‍പ്പെട്ട വിദ്യാര്‍ഥികളോട് നശിച്ചുപോകരുതെന്ന് സി പി എം പറയണം. കേരളത്തില്‍ സാമൂഹിക വിരുദ്ധ പ്രസ്ഥാനമായി മാറിയിരിക്കുകയാണ് അവര്‍.

ഇന്നലെ കേരള സര്‍വകലാശാലയില്‍ തിരഞ്ഞെടുപ്പ് കഴിഞ്ഞ് പുറത്തേക്ക് വന്ന പെണ്‍കുട്ടികള്‍ ഉള്‍പ്പെടെയുള്ള കെ എസ് യു പ്രവര്‍ത്തകരെ ക്രൂരമായി ആക്രമിച്ചു. അവരെ രക്ഷിക്കാനെത്തിയ പോലീസിനെയും ഉപദ്രവിച്ചു. ഇന്ന് പുലര്‍ച്ചെ ബാര്‍ അസ്സോസിയേഷന്‍ പ്രവര്‍ത്തകര്‍ അവരുടെ വാര്‍ഷികാഘോഷത്തിന് തയ്യാറാക്കിയ ഭക്ഷണം മുഴുവന്‍ കഴിച്ചുതീര്‍ത്ത് അവിടെയുണ്ടായിരുന്ന സ്ത്രീകളെ അധിക്ഷേപിച്ചു. പരിപാടി നടക്കുന്നയിടത്തേക്ക് ഇരച്ചുകയറിയ സംഘം ബഹളമുണ്ടാക്കി കൂട്ടയടിയാക്കി. അത് രാഷ്ട്രീയ സംഘര്‍ഷമായിരുന്നില്ലെന്നും സതീശന്‍ പറഞ്ഞു.