വെറുപ്പിന്റെ വൈബ്!

സഹപാഠികളെ അക്രമങ്ങൾക്കിരയാക്കുന്ന റാഗിംഗ്​ മുതൽ ബന്ധുക്കളടക്കമുള്ളവരെ കൊന്നുതള്ളുന്ന സംഭവങ്ങൾ വരെ പതിവ്​ വാർത്തയാവുന്ന ഒരു ‘കറുത്ത കാല’ത്തിലൂടെയാണോ നമ്മുടെ സമൂഹം കടന്നുപേകുന്നത്​ എന്ന്​ സംശയിക്കേണ്ടിയിരിക്കുന്നു. സാക്ഷരതയിലും സാംസ്കാരിക മേഖലയിലും ഇതര സംസ്ഥാനങ്ങളെ അപേക്ഷിച്ച്​ കാലങ്ങളായി മുൻപന്തിയിൽ നിൽക്കുന്ന കേരളത്തിൽ നിന്ന്​ ഒരിക്കലും കേൾക്കാൻ ആഗ്രഹിക്കാത്ത വാർത്തകളാണ്​ ഓരോ ദിവസവും നമ്മളെ തേടിയെത്തുന്നത്​. ആറ്​ മണിക്കൂറിനുള്ളിൽ അഞ്ച്​ കൊലപാതകങ്ങൾ അരങ്ങേറിയ തിരുവനന്തപുരം വെഞ്ഞാറമൂട്​ കൂട്ടക്കൊല ഏറെ നടുക്കുന്നതാണ്. അക്രമവും മരണങ്ങളും തുടർന്നുകൊണ്ടേയിരിക്കുന്നു.

സാംസ്കാരിക നായകന്മാരുടെയും മതപണ്ഡിതന്മാരുടെ നന്മതുളമ്പുന്ന വാക്കുകളെ പിന്തുടർന്ന്​ മുന്നോട്ടുപോയിരുന്ന നമ്മുടെ സമൂഹം ഈ അടുത്തകാലത്ത്​ അക്രമത്തിലേക്കും അധാർമികതയിലേക്കും അരാജകത്വത്തിലേക്കും വഴുതിപ്പോകുന്നതിന്റെ സൂചകളാണ്​ ഇപ്പോൾ കണ്ടുകൊണ്ടിരിക്കുന്നത്​. ഇത്തരം സംഭവങ്ങൾക്കു പിറകിലുള്ള പ്രധാന കാരണങ്ങളായി ചൂണ്ടിക്കാണിക്കാനുള്ളത്​ സമീപകാലത്ത്​ കണ്ടുവരുന്ന ജീവിതവീക്ഷണങ്ങളിലെ താളപ്പിഴകളാണ്.

ഉയർന്ന വിദ്യാഭ്യാസം ഒരു വ്യക്​തിയെ കൂടുതൽ സംസ്കാരസമ്പന്നനാക്കുമെന്നാണ്​ പണ്ടുകാലം മുതൽ നാം വിശ്വസിച്ച്​ പോന്നതെങ്കിലും പുതിയ സംവഭവികാസങ്ങൾ അത്തരം വിശ്വാസങ്ങളെ ചോദ്യംചെയ്യുന്നവയാണ്​. സമകാലീന സമൂഹത്തിൽ സംഭവിച്ചുകൊണ്ടിരിക്കുന്ന അക്രമസംഭവങ്ങളിലും കൊലപാതകങ്ങളിലുമെല്ലാം പ്രതിസ്ഥാനത്ത്​ നിൽക്കുന്നത്​ ഉയർന്ന വിദ്യാഭ്യാസം നേടിയവർ തന്നെയാണ്​. മികച്ച വിദ്യാഭ്യാസം നേടിയ കുടുംബങ്ങൾ കൂട്ടത്തോ​െട ആത്മഹത്യ ചെയ്യുന്നതും ഇതോടൊപ്പം ചേർത്തുവായിക്കേണ്ടതാണ്​.

പണ്ടൊന്നുമില്ലാത്ത തരത്തിൽ പാശ്ചാത്യ സംസ്കാരങ്ങളോട്​ ആഭിമുഖ്യം പുലർത്തുന്ന പുതുതലമുറ മുതൽ അക്രമങ്ങളും മയക്കുമരുന്നിന്റെ ഉപയോഗവും മഹത്വവത്​കരിച്ച്​ ചിത്രീകരിക്കുന്ന സിനിമകളും വ്യാപകമായി ലഭ്യമാകുന്ന പുതിയ തരത്തിലുള്ള ലഹരിവസ്തുക്കളുമെല്ലാം ഒരു സംഭവത്തിലല്ലെങ്കിൽ മറ്റൊരു സംഭവത്തിൽ വില്ലന്റെ സ്ഥാനത്ത്​ നിൽപ്പുണ്ട്​.

ധാർമികതയെ കൊല്ലുന്ന ലഹരി

മുൻകാലങ്ങളിൽ ഒരു മദ്യപാനിക്ക്​ സമൂഹം ഏറ്റവും താഴ്ന്ന സ്ഥാനമാണ്​ കൽപ്പിച്ചുനൽകിയിരുന്നതെങ്കിൽ, പുതികാലത്ത്​ മദ്യപിക്കാത്തവൻ ‘ഒന്നിനും കൊള്ളാത്ത പച്ചക്കറി’യായി എണ്ണപ്പെടുകയാണ്​. മദ്യവും മയക്കുമരുന്നുകളും ജീവിതത്തിന്റെ ഒരു ഭാഗമായി സമൂഹം വളരെ പതുക്കെയാണെങ്കിലും അംഗീകരിക്കുന്നുണ്ടോ എന്നും ഭയപ്പെടേണ്ടിയിരിക്കുന്നു. സമൂഹത്തിലെ ചെറുതല്ലാത്ത ഒരു വിഭാഗമെങ്കിലും വിവാഹം പോലുള്ള ആഘോഷാവസരങ്ങളിൽ മദ്യസത്​കാര​ം പരസ്യമായി നടത്തുന്നതും കാണാതിരുന്നുകൂടാ​.

പുതിയ തലമുറയെ കാർന്നുതിന്നുന്ന രാസലഹരികളുടെ ഉപയോഗത്തിനും സമൂഹത്തിന്റെ ധാർമികമായ അധഃപതനത്തിൽ വലിയ പങ്കുണ്ട്​​. കൂട്ടക്കൊലപാതകങ്ങളും കൊടുംക്രൂരതകൾ ഉൾപ്പെടുന്ന അക്രമങ്ങളും നടത്തുന്നതിന്​ പിറകിൽ ഇത്തരം ലഹരിയുപയോഗങ്ങളുടെ സാധ്യത തള്ളിക്കളയാൻ കഴിയില്ല. ലഹരിയുപയോഗിക്കുന്നതോടെ ഒരു വ്യക്​തിയുടെ ബോധതലത്തിൽ വലിയ തോതിലുള്ള മാറ്റങ്ങളാണ്​ സംഭവിക്കുന്നത്​. ലഹരിവസ്തുക്കൾ ശരീരത്തിലെത്തുന്നതോടെ വ്യക്​തിയുടെ മസ്തിഷ്കത്തിലെ ‘പ്രീഫ്രോണ്ടൽ ലോബ്’ (Prefrontal lobe) എന്ന ഭാഗത്തിന്റെ ​​​പ്രവർത്തനം മന്ദഗതിയിലാവുകയും താൻ എന്താണ്​ ചെയ്യുന്നത്​ എന്ന്​ തിരിച്ചറിയാൻ കഴിയാത്ത അവസ്ഥയിലേക്ക്​ ആ വ്യക്​തിയെ എത്തിക്കുകയും ചെയ്യും. ഏതൊരു വ്യക്​തിയുടെയും ബോധപൂർവമായ പ്രവർത്തനങ്ങളെ നിയന്ത്രിക്കുന്ന തലച്ചോറിന്റെ ഭാഗമായ ‘പ്രീഫ്രോണ്ടൽ ലോബ്’ ആണ്​ ഒരാളുടെ വ്യക്തിത്വവും സാമൂഹികമായി പെരുമാറേണ്ട രീതികളെയും രൂപപ്പെടുത്തുന്നത്​​.

സാഹചര്യത്തിന്റെ സമ്മർദങ്ങൾ കൊണ്ടോ മറ്റെന്തെങ്കിലും കാരണങ്ങളാലോ തെറ്റുകളും കുറ്റകൃത്യങ്ങളും നടത്താനുള്ള ഒരു വ്യക്​തിയുടെ പ്രേരണകളെ ഇല്ലാതാക്കുന്ന മസ്തിഷ്കത്തിലെ ഈ ഭാഗത്തിന്റെ ഇടപെടൽ കൊണ്ടുതന്നെയാണ്​. മനുഷ്യനും മൃഗങ്ങളും തമ്മിലുള്ള പ്രധാന വ്യത്യാസം ഇത്തരം അപകടകരമായ ചിന്തകളെ നിയന്ത്രിക്കുന്ന ‘പ്രീഫ്രോണ്ടൽ ലോബി’ന്റെ സാന്നിധ്യമാണെന്ന്​ കരുതേണ്ടിയിരിക്കുന്നു​.

രണ്ട്​ പതിറ്റാണ്ട്​ മുമ്പ്​ മദ്യം, പുകവലി പോലുള്ള ലഹരികളാണ്​ സമൂഹ​ത്തിന്​ ഭീഷണിയുയർത്തിയിരുന്നതെങ്കിൽ ഇന്ന്​ പുതുതായി രംഗപ്രവേശം ചെയ്ത കഞ്ചാവ്​, എം ഡി എം എ തുടങ്ങിയ രാസലഹരികളാണ്​ വെല്ലുവിളികൾ ഉയർത്തുന്നത്​​. കടുത്ത പ്രത്യാഘാതങ്ങൾ സൃഷ്ടിക്കാൻ ഇടയുള്ള ഇത്തരം ലഹരികളുടെ ഉപയോഗം കാരണം അത്​ ഉപയോഗിക്കുന്നവർ​ തങ്ങൾ എന്താണ്​ പ്രവർത്തിക്കുന്നത്​ എന്ന്​ തിരിച്ചറിയാൻ പോലും കഴിയാത്ത അവസ്ഥയിലാകുന്നു.

ഇത്തരം സാഹചര്യങ്ങളിലാണ്​ തങ്ങളെ കഷ്ടപ്പെട്ടും സ്​നേഹിച്ചും വളർത്തിയ മാതാപിതാക്കളെപ്പോലും ചിലർ കൊലക്കത്തിക്ക്​ ഇരയാക്കുന്നത്​. ഇവരുടെ മനസ്സിൽ രക്​തബന്ധത്തിന്റെ പരിപാവനതയോ നിയമവ്യവസ്ഥയെക്കുറിച്ചുള്ള ബോധമോ കുറ്റകൃത്യങ്ങൾക്കുള്ള ശിക്ഷയെക്കുറിച്ചുള്ള ഭയമോ ഉണ്ടാകില്ല. ഫലമോ, സമാനതകളില്ലാത്ത ​ക്രൂരതകളിൽ ഏർപ്പെടാൻ ഇത്തരക്കാർ മടികാണിക്കുകയില്ല. ഒരിക്കൽ ഉപയോഗിച്ചുതുടങ്ങിയാൽ പിന്നീട്​ അതിന്റെ ഉപയോഗത്തിൽ നിന്ന്​ രക്ഷനേടാൻ ​വളരെ പ്രയാസമാണെന്നതാണ്​ ഇത്തരം രാസലഹരികൾ സൃഷ്ടിക്കുന്ന ഏറ്റവും വലിയ അപകടം.

വിഷം വിൽക്കുന്ന മാഫിയ

വൻതോതിലുള്ള സാമ്പത്തിക ലാഭം ലക്ഷ്യമിട്ടാണ്​ മയക്കുമരുന്ന്​ വിപണി സമൂഹത്തിൽ വലവിരിക്കുന്നതെങ്കിൽ ജീവിത യാഥാർഥ്യങ്ങളെ നേരിടാൻ ശക്​തിയില്ലാതെ, അതിൽനിന്ന്​ രക്ഷപ്പെടാൻ ശ്രമിക്കുന്നവരാണ്​ ലഹരി ഉപയോഗങ്ങളുടെ ചതിക്കുഴികളിൽ വീണുപോകുന്നത്​. കൂട്ടുകൂടി നടക്കുന്ന പ്രായത്തിൽ വെറുതെ ഒരു രസത്തിന്​ വേണ്ടിയോ മറ്റുള്ളവരുടെ നിർബന്ധത്തെ ​പ്രതിരോധിക്കാൻ കഴിയാത്ത അവസ്ഥയിലോ ആരംഭിക്കുന്ന ലഹരിയുപയോഗം പിന്നീട്​ അവരെ മയക്കുമരുന്നുകളുടെ അടിമകളാക്കി മാറ്റുന്നു. ലഹരിക്ക്​ അടിമപ്പെടുന്നതോടെ ലഹരിവസ്തുക്കൾ വാങ്ങാൻ പണം ആവശ്യമായി വരികയും അത്​ ലഭ്യമല്ലാത്തവർ മോഷണം, പിടിച്ചുപറി, കൊലപാതകം തുടങ്ങിയ കുറ്റകൃത്യങ്ങളിൽ ഏർപ്പെടുകയും ചെയ്​തേക്കാം. കുറ്റകൃത്യങ്ങൾ പതിവാക്കുന്നതോടെ ഇത്തരക്കാരുടെ സംഘങ്ങളിൽ എത്തിപ്പെടുകയും കൂടുതൽ ലഹരിയുപയോഗത്തിലേക്ക്​ വീഴുകയും ചെയ്യും. നിലവിൽ കേരളമടക്കമുള്ള സംസ്ഥാനങ്ങൾ നേരിടുന്ന ഏറ്റവും വലിയ ഭീഷണികളിലൊന്നാണ്​ മയക്കുമരുന്ന്​ കടത്തും അതിന്റെ സമൂഹത്തിലുള്ള വ്യാപനവും.

ഉണരുക സമൂഹമേ…

വ്യക്​തികളെയും കുടുംബങ്ങളെയും മാത്രമല്ല, സമൂഹത്തെ ഒന്നടങ്കം ഗ്രസിച്ചിരിക്കുന്ന ലഹരിയുപയോഗം എന്ന വിപത്തിനെതിരെ കക്ഷിരാഷ്ട്രീയമോ ജാതിമതഭേദമോ മറന്ന്​ എല്ലാവരും കൈകോർക്കേണ്ട സമയം അതിക്രമിച്ചിരിക്കുന്നു. വൻലാഭം ലക്ഷ്യമിട്ട്​, തലമുറകളെതന്നെ നശിപ്പിക്കാനൊരുങ്ങിനിൽക്കുന്ന ധാർമികത ഒട്ടുമില്ലാത്ത ലഹരിമാഫിയകളെ വേരോടെ പിഴുതുമാറ്റാൻ എല്ലാ രാഷ്ട്രീയ കക്ഷികളും മതവിഭാഗങ്ങളും ചേർന്ന്​ വ്യക്​തമായ കാഴ്ചപ്പാടോടുകൂടിയ പദ്ധതികൾ ആവിഷ്കരിച്ച്​ നടപ്പാക്കേണ്ടതുണ്ട്​.

മയക്കുമരുന്നുകൾക്കെതിരായ പ്രതിരോധപ്രവർത്തനങ്ങൾ കടലാസുകളിൽ ഒതുങ്ങിപ്പോവുന്ന പതിവ്​ രീതികളെ തിരിച്ചറിഞ്ഞ്​ സർക്കാർ ഏജൻസികളുടെ ആഭിമുഖ്യത്തിൽ സന്നദ്ധസംഘടകളുടെയും മത- സാംസ്കാരിക സംഘനകളുടെയും സഹകരണത്തോടെ പ്രായോഗികമായ പദ്ധതികൾ ആസൂത്രണം ചെയ്ത്​ യുദ്ധകാലാടിസ്ഥാനത്തിൽ നടപ്പാക്കുകയാണ്​ വേണ്ടത്​​. സമൂഹത്തിലെ ലഹരിയുടെ സാന്നിധ്യം തുടക്കത്തിൽതന്നെ കണ്ടെത്തി ഇല്ലാതാക്കാൻ എക്​സൈസ്, പോലീസ്​ എന്നിവക്ക്​ പുറമെ അധ്യാപകർ, ആരോഗ്യപ്രവർത്തകർ, റസിഡൻസ്​ അസോസിയേഷനുകൾ എന്നിവയുടെ പ്രവർത്തനങ്ങളും അനിവാര്യമാണ്​.

(ലേഖകൻ കോഴിക്കോട്​ ‘ചേതന സെന്റർ ഫോർ ന്യൂറോ സൈക്യാട്രി’ യുടെ ഡയറക്ടറാണ്​)