വഖ്ഫ് ഭേദഗതി നിയമം: ബംഗാളില്‍ പ്രതിഷേധം കത്തി; പോലീസ് വാഹനങ്ങള്‍ അഗ്നിക്കിരയാക്കി

കൊല്‍ക്കത്ത | വഖ്ഫ് ഭേദഗതി നിയമമായതോടെ പശ്ചിമ ബംഗാളിലെ മുര്‍ഷിദാബാദില്‍ നടന്ന പ്രതിഷേധം അക്രമാസക്തമായി. റോഡുകള്‍ ഉപരോധിക്കാനുള്ള പ്രതിഷേധക്കാരുടെ ശ്രമം പോലീസ് തടഞ്ഞതോടെയാണ് അനിഷ്ട സംഭവങ്ങള്‍ അരങ്ങേറിയത്. പ്രതിഷേധക്കാര്‍ പോലീസ് വാഹനങ്ങള്‍ അഗ്നിക്കിരയാക്കി. പോലീസിനു നേരെ കല്ലെറിഞ്ഞു.

വഖ്ഫ് നിയമം ഇന്ന് മുതല്‍ പ്രാബല്യത്തില്‍ വരുത്തിക്കൊണ്ട് കേന്ദ്ര സര്‍ക്കാര്‍ വിജ്ഞാപനം പുറപ്പെടുവിച്ചിരുന്നു. നിയമത്തിനെതിരെ സുപ്രീം കോടതിയില്‍ ഹരജികള്‍ നിലനില്‍ക്കെയാണ് വിജ്ഞാപനം.

ഇക്കഴിഞ്ഞ ശനിയാഴ്ച രാത്രി രാഷ്ട്രപതി ഒപ്പ് വച്ച് രാഷ്ട്രപതി ഭവന്‍ വിജ്ഞാപനമിറക്കിയതോടെയാണ് വഖ്ഫ് ബില്‍ നിയമമായത്.