ഡൽഹി ആര് ഭരിക്കും? ഫലം നിർണയിക്കുക ഈ ഘടകങ്ങൾ

ന്യൂഡൽഹി | ന്യൂഡൽഹിയിൽ തുടർച്ചയായി നാലാം തവണയും ആം ആദ്മി പാർട്ടി അധികാരത്തിൽ വരുമോ? അതോ എക്സിറ്റ് പോളുകൾ പ്രവചിക്കുന്ന പോലെ 27 വർഷത്തെ ഇടവേളക്ക് ശേഷം ബിജെപി തിരിച്ചുവരവ് നടത്തുമോ? നാളെയാണ് ഡൽഹിയിൽ വോട്ടെണ്ണൽ. വോട്ടെണ്ണിക്കഴിയുമ്പോൾ മാത്രമേ അക്കാര്യത്തിൽ എന്ത് സംഭവിച്ചു എന്ന് വ്യക്തമാകൂ. പ്രധാനമായും അഞ്ച് കാര്യങ്ങളാണ് ഡൽഹിയിൽ തിരഞ്ഞെടുപ്പിൽ സ്വാധീനം ചെലുത്തുന്നത്.

വോട്ട് ഷെയറുകളിലെ മാറ്റങ്ങൾ

1993-ൽ ഡൽഹി അസംബ്ലി തിരഞ്ഞെടുപ്പിൽ ആദ്യമായി വിജയം നേടിയ ബിജെപിയുടെ വോട്ട് ഷെയർ 30% മുതൽ 40% വരെയായിരുന്നു. 1998 മുതൽ 2008 വരെ കാലയളവിൽ കോൺഗ്രസിനായിരുന്നു ഭരണം. 2013ൽ ഏറ്റവും വലിയ ഒറ്റകക്ഷി ആയെങ്കിലും ഭരണംപിടിക്കാനായില്ല. പിന്നീട് കണ്ടത് പുതുതായി രൂപംകൊണ്ട എഎപിക്ക് പിന്നിൽ ബിജെപി കൂപ്പുകുത്തുന്നതാണ്.

2015-ൽ 32.19% ആയിരുന്ന ബിജെപിയുടെ വോട്ട് ഷെയർ 2020-ൽ 38.51% ആയി ഉയർന്നെങ്കിലും, സീറ്റുകൾ മൂന്നിൽ നിന്ന് എട്ടായി മാത്രമേ വർദ്ധിച്ചുള്ളൂ. എന്നാൽ ആം ആദ്മി പാർട്ടിയുടെ വോട്ട് ഷെയർ 2015-ൽ 54.34% ആയിരുന്നത് 2020-ൽ 53.57% ആയി സ്ഥിരമായി നിലനിന്നു.

എന്നിരുന്നാലും, ഇന്ത്യാ ബ്ലോക്കിലെ അംഗങ്ങളായ ആം ആദ്മി പാർട്ടിയും കോൺഗ്രസും തമ്മിൽ ഒത്തുതീർപ്പ് ഉണ്ടാകാതിരുന്നത് ആം ആദ്മി പാർട്ടിയുടെ വോട്ട് ഷെയറിനെ ബാധിക്കുമെന്ന് കരുതപ്പെടുന്നു. കോൺഗ്രസിന്റെ വോട്ട് ഷെയർ 2008-ൽ 40.31% ആയിരുന്നത് 2013ൽ 24.55 ശതമാനമായും 2015ൽ 9.65 ശതമാനമായും കുറഞ്ഞ് 2020-ൽ 4.26% ആയി കുത്തനെ താഴോട്ട് പതിക്കുകയായിരുന്നു.

പാർലിമെന്റ് തിരഞ്ഞെടുപ്പിൽ ഡൽഹിയിലെ ഏഴ് മണ്ഡലങ്ങളും തൂത്തുവാരാനായതിന്റെ പ്രതീക്ഷയിലാണ് ഇത്തവണ ബിജെപി കളത്തിൽ ഇറങ്ങിയത് എന്നതും ശ്രദ്ധേയമാണ്.

മിഡിൽ ക്ലാസ് വോട്ടർമാരുടെ സ്വാധീനം

ഡൽഹിയിലെ മിഡിൽ ക്ലാസ് വോട്ടർമാരാണ് ഈ തിരഞ്ഞെടുപ്പ് പ്രചാരണത്തിന്റെ കേന്ദ്രബിന്ദു. “പാവപ്പെട്ടവരുടെ പാർട്ടി” എന്ന് സ്വയം വിശ്വസിക്കുന്ന ആം ആദ്മി പാർട്ടി, മിഡിൽ ക്ലാസിന് അനുകൂലമായ ഒരു മാനിഫെസ്റ്റോ പ്രഖ്യാപിച്ചാണ് തിരഞ്ഞെടുപ്പിനെ നേരിടുന്നത്. എന്നാൽ, മിഡിൽ ക്ലാസുമായി ബന്ധപ്പെട്ട പാർട്ടിയായ ബിജെപിയും ഈ വോട്ടർ ബേസ് ലക്ഷ്യമിടുന്നു. ഫെബ്രുവരി ഒന്നിന് ധനമന്ത്രി നിർമല സീതാരാമൻ പാർലിമെന്റിൽ അവതരിപ്പിച്ച ബജറ്റിൽ ആദായ നികുതി പരിധി ഉയർത്തിയത് അടക്ക മിഡിൽക്ലാസിനെ തൃപ്തിപ്പെടുത്തുന്ന പ്രഖ്യാപനങ്ങളുള്ളത് ബിജെപിക്ക് ഈ വിഭാഗത്തിന്റെ വോട്ടിൽ പ്രതീക്ഷ നൽകുന്ന ഘടകമാണ്.

2022-ലെ ഒരു റിപ്പോർട്ട് പ്രകാരം, ഡൽഹിയിലെ 67.16% ജനസംഖ്യയാണ് മിഡിൽ ക്ലാസ്. 2015, 2020 തിരഞ്ഞെടുപ്പുകളിൽ മിഡിൽ ക്ലാസ് വോട്ടുകൾ ആം ആദ്മി പാർട്ടിക്ക് അനുകൂലമായിരുന്നു.

സ്ത്രീ വോട്ടർമാരുടെ പ്രാധാന്യം

സ്ത്രീകളുടെ വോട്ട് ഇത്തവണയും പ്രധാനമാണ്. 2020-ൽ സ്ത്രീകൾക്ക് സൗജന്യ ബസ് യാത്ര നൽകിയത് ആം ആദ്മി പാർട്ടിയുടെ വിജയത്തിന് കാരണമായിരുന്നു. ഇത്തവണ ആം ആദ്മി പാർട്ടി സ്ത്രീകൾക്ക് പ്രതിമാസം 2,100 രൂപ നൽകുമെന്ന് വാഗ്ദാനം ചെയ്തിട്ടുണ്ട്. ബിജെപിയും കോൺഗ്രസും 2,500 രൂപ നൽകുമെന്ന് പ്രഖ്യാപിച്ചു.

ഡൽഹിയിൽ 72.36 ലക്ഷം സ്ത്രീ വോട്ടർമാരുണ്ട്. 2015-ൽ 53% സ്ത്രീ വോട്ട് ഷെയർ നേടിയ ആം ആദ്മി പാർട്ടി, 2020-ൽ ഇത് 60% ആയി ഉയർത്തി. ഇതേ കാലയളവിൽ ബിജെപിയുടെ സ്ത്രീ വോട്ട് ഷെയർ 34 ശതമാനവും 35 ശതമാനവുമായിരുന്നു.

ദളിത്, മുസ്ലിം വോട്ടുകളുടെ പ്രാധാന്യം

ഡൽഹിയിലെ 12 എസ് സി സീറ്റുകളിൽ ആം ആദ്മി പാർട്ടിയുടെ ആധിപത്യമാണ്. എന്നാൽ, മായാവതിയുടെ ബഹുജൻ സമാജ് പാർട്ടി (BSP), ചന്ദ്രശേഖറിന്റെ ആസാദ് സമാജ് പാർട്ടി (കാൻഷി റാം) എന്നിവയുടെ സാന്നിധ്യം ആം ആദ്മി പാർട്ടിയുടെ വോട്ട് ഷെയറിനെ ബാധിക്കുമെന്ന് കരുതപ്പെടുന്നു.

മുസ്ലിം വോട്ടുകളും ഇത്തവണ പ്രധാനമാണ്. ഡൽഹിയിലെ 23 സീറ്റുകളിൽ മുസ്ലിംകളുടെ സാന്നിധ്യം ശക്തമാണ്. പ്രത്യേകിച്ച് വടക്കുകിഴക്കൻ ഡൽഹി, മധ്യ ഡൽഹി ജില്ലകളിലെ ജനസംഖ്യയിൽ മുസ്ലീങ്ങൾ വലിയൊരു പങ്കു വഹിക്കുന്ന ജില്ലകളിലെ ന്യൂനപക്ഷ വോട്ടുകൾ നിർണായകമായേക്കാം. ഡൽഹിയിലെ ജനസംഖ്യയുടെ 12.9% മുസ്ലീങ്ങളാണെങ്കിലും, വടക്കുകിഴക്കൻ ഡൽഹിയിലും മധ്യ ഡൽഹിയിലും അവർ യഥാക്രമം 29.3% ഉം 33.4% ഉം ആണ്.

ഡൽഹിയിൽ 23 സീറ്റുകളുണ്ട്, അവിടെ മുസ്ലീങ്ങൾ ജനസംഖ്യയുടെ 10% എങ്കിലും വരും. 2015 നും 2020 നും ഇടയിൽ, ഈ സീറ്റുകളിലെ ആം ആദ്മി പാർട്ടിയുടെ വോട്ട് വിഹിതം ഏകദേശം 55% ആയി സ്ഥിരമായി തുടർന്നെങ്കിലും, ബിജെപിയുടെ വോട്ട് വിഹിതം 29.44% ൽ നിന്ന് 34.57% ആയി ഉയർന്നു, കോൺഗ്രസിന്റെ വോട്ട് 12.81% ൽ നിന്ന് 5.57% ആയി കുറയുകയാണുണ്ടായത്.