വഖഫ് ബിൽ രാജ്യസഭ കടക്കുമോ? കണക്കുകൾ ഇങ്ങനെ

ന്യൂഡൽഹി | ലോക്‌സഭയിൽ വ്യാഴാഴ്ച പുലർച്ചെ പാസായ വഖഫ് (ഭേദഗതി) ബിൽ 2024 രാജ്യസഭയിൽ ചർച്ചയ്ക്ക് വെച്ചു. പാർലമെൻ്റിൻ്റെ ബജറ്റ് സമ്മേളനത്തിൻ്റെ അവസാന ദിവസമായ ഇന്ന് ന്യൂനപക്ഷ കാര്യ മന്ത്രി കിരൺ റിജിജുവാണ് ബിൽ ചർച്ചയ്ക്കായി അവതരിപ്പിച്ചത്. രാജ്യസഭയും ബിൽ അംഗീകരിച്ചാൽ, പ്രസിഡൻ്റ് ദ്രൗപതി മുർമുവിൻ്റെ അംഗീകാരത്തിനായി അയയ്ക്കും. പ്രസിഡൻ്റ് അംഗീകരിക്കുന്നതോടെ ബിൽ നിയമമാകും.

ലോക്‌സഭയിൽ ഭരണകക്ഷിയായ എൻഡിഎയിലെ 288 അംഗങ്ങൾ ബില്ലിനെ അനുകൂലിച്ചു വോട്ട് ചെയ്തപ്പോൾ പ്രതിപക്ഷത്തെ 232 എംപിമാർ എതിർത്തു. 543 അംഗങ്ങളുള്ള സഭയിൽ കേവല ഭൂരിപക്ഷത്തിന് 273 സീറ്റുകളാണ് വേണ്ടത്.

രാജ്യസഭയിലെ കണക്കുകൾ എങ്ങനെ?

നിലവിൽ 236 അംഗങ്ങളുള്ള രാജ്യസഭയിൽ എൻഡിഎയ്ക്ക് 117 അംഗങ്ങളുണ്ട്. ഭൂരിപക്ഷത്തിന് 119 സീറ്റുകളാണ് വേണ്ടത്. എന്നാൽ, രണ്ട് നാമനിർദ്ദേശം ചെയ്യപ്പെട്ട അംഗങ്ങളും ആറ് സ്വതന്ത്ര അംഗങ്ങളും ചേരുമ്പോൾ ഭരണമുന്നണിയുടെ അംഗബലം 125 ആയി ഉയരും. ഇത് കേവല ഭൂരിപക്ഷത്തിന് മുകളിലാണ്. എൻഡിഎയിലെ ഏറ്റവും വലിയ കക്ഷിയായ ബിജെപിക്ക് മാത്രം രാജ്യസഭയിൽ 98 എംപിമാരുണ്ട്. ജനതാദൾ (യുണൈറ്റഡ്) (4), നാഷണലിസ്റ്റ് കോൺഗ്രസ് പാർട്ടി (3), തെലുങ്കുദേശം പാർട്ടി (2) എന്നിവയുൾപ്പെടെ 10 പാർട്ടികൾക്ക് ഓരോ അംഗം വീതവുമുണ്ട്.

മറുവശത്ത്, പ്രതിപക്ഷമായ ഇൻഡ്യാ ബ്ലോക്കിന് രാജ്യസഭയിൽ 88 എംപിമാരുണ്ട്. കോൺഗ്രസ് (27), തൃണമൂൽ കോൺഗ്രസ് (13), ദ്രാവിഡ മുന്നേറ്റ കഴകം, ആം ആദ്മി പാർട്ടി (10 വീതം), രാഷ്ട്രീയ ജനതാദൾ (5), സമാജ്‌വാദി പാർട്ടി, സിപിഐ-എം (4 വീതം), ജാർഖണ്ഡ് മുക്തി മോർച്ച (3) എന്നിവയാണ് പ്രധാന കക്ഷികൾ.

എൻഡിഎയിലോ ഇൻഡ്യാ ബ്ലോക്കിലോ ഉൾപ്പെടാത്ത 23 എംപിമാരുമുണ്ട്. ഈ സാഹചര്യത്തിൽ രാജ്യസഭയിൽ ബിൽ പാസാകാനുള്ള സാധ്യത എൻഡിഎ മുന്നിൽ കാണുന്നു.