യുവതി എഫ് ബിയിലിട്ട ചിത്രം മോര്‍ഫ് ചെയ്തയച്ചു; പ്രതി അറസ്റ്റില്‍

പത്തനംതിട്ട | വിവാഹിതയും 32 കാരിയുമായ യുവതി ഫേസ് ബുക്ക് പേജില്‍ പോസ്റ്റ് ചെയ്ത സ്വന്തം ചിത്രം മോര്‍ഫ് ചെയ്ത് നഗ്നഫോട്ടോയാക്കി അവര്‍ക്കു തന്നെ അയച്ചുകൊടുത്ത കേസില്‍ പ്രതി അറസ്റ്റില്‍. കോയിപ്രം വെണ്ണിക്കുളം പാട്ടക്കാല ചാപ്രത്ത് വീട്ടില്‍ മിഥുന്‍ സി വര്‍ഗീസ് (26) ആണ് അറസ്റ്റിലായത്.

യുവതിയുടെ പരിചയക്കാരനായ യുവാവ് സ്വന്തം എഫ് ബി അക്കൗണ്ടില്‍ നിന്നും യുവതിയുടെ ഫേസ് ബുക്ക് ഐ ഡി ലിങ്കിലേക്ക് മോര്‍ഫ് ചെയ്ത ചിത്രം അയക്കുകയായിരുന്നു. യുവതി ഇട്ട ഫോട്ടോ രൂപമാറ്റം വരുത്തി നഗ്നചിത്രമാക്കിയ ശേഷമാണ് അയച്ചത്. പരാതിക്കാരിയുടെ മൊഴി എസ് സി പി ഒ. ഷെബി രേഖപ്പെടുത്തി. പോലീസ് പട്ടിക ജാതി വിഭാഗത്തിനെതിരായ അതിക്രമത്തിനുള്ള വകുപ്പുകളും, ഐ ടി നിയമത്തിലെ വകുപ്പും, ബി എന്‍ എസ് നിയമത്തിലെ ബന്ധപ്പെട്ട വകുപ്പുകളും ചേര്‍ത്ത് കേസ് രജിസ്റ്റര്‍ ചെയ്ത് കോയിപ്രം പ്രതിയെ അറസ്റ്റ് ചെയ്യുകയായിരുന്നു. ഇയാളുടെ മൊബൈല്‍ ഫോണ്‍ പിടിച്ചെടുത്തു. യുവതിയുടെ മൊബൈല്‍ ഫോണും വിശദ പരിശോധനക്കായി വാങ്ങിയിട്ടുണ്ട്.

കോയിപ്രം പോലീസ് ഇന്‍സ്‌പെക്ടര്‍ ജി സുരേഷ് കുമാറിന്റെ നേതൃത്വത്തിലാണ് അന്വേഷണം നടക്കുന്നത്. പ്രതിയെ പിടികൂടിയ സംഘത്തില്‍ ഇന്‍സ്‌പെക്ടര്‍ക്കൊപ്പം എസ് ഐ. ഗോപകുമാര്‍, എസ് സി പി ഒ. ശബാന, സി പി ഒ. സുരേഷ് എന്നിവരാണ് ഉണ്ടായിരുന്നത്.