പ്രസവ പരിചരണ കേന്ദ്രത്തിൽ ചികിത്സക്കെത്തിയ യുവതിയുടെ നഗ്നദൃശ്യം കാമുകന് അയച്ചു; ജീവനക്കാരി അറസ്റ്റിൽ

പൊന്നാനി | പ്രസവ പരിചരണ കേന്ദ്രത്തിൽ ചികിത്സയ്ക്കെത്തിയ സ്ത്രീയുടെ നഗ്ന ദൃശ്യങ്ങൾ വിദേശത്തുള്ള തന്റെ കാമുകന് അയച്ച കേസിൽ ഒരു ജീവനക്കാരിയെ പൊലീസ് അറസ്റ്റ് ചെയ്തു. മാറഞ്ചേരി പുറങ്ങ് സ്വദേശിനി ഉഷ (24) ആണ് അറസ്റ്റിലായത്.

വെളിയങ്കോട്ടെ പ്രസവ പരിചരണ കേന്ദ്രത്തിലാണ് സംഭവം. കേന്ദ്രത്തിൽ ചികിത്സയ്ക്കെത്തിയ സ്ത്രീയുടെ നഗ്ന ചിത്രങ്ങൾ ഉഷ തന്റെ മൊബൈൽ ഫോണിൽ പകർത്തി വിദേശത്തുള്ള കാമുകന് അയച്ചതായാണ് പരാതി. മറ്റൊരു സ്ത്രീയാണ് സംഭവം കണ്ടെത്തിയത്.

തുടർന്ന് ഇരയുടെ ബന്ധുക്കൾ പൊലീസിൽ പരാതി നൽകി. പൊലീസ് നടത്തിയ അന്വേഷണത്തിൽ ഉഷയുടെ മൊബൈൽ ഫോണിൽ നിന്ന് തെളിവുകൾ ലഭിച്ചു. ഫോൺ കോടതിയിൽ ഹാജരാക്കിയിട്ടുണ്ട്. ഈ സംഭവത്തിൽ ഉഷയുടെ കാമുകനെതിരെയും കേസെടുത്തിട്ടുണ്ട്.