വഞ്ചിയൂരില്‍ യുവതിക്ക് നേരെ വെടിവെപ്പ്; വനിതാ ഡോക്ടര്‍ അറസ്റ്റില്‍

തിരുവനന്തപുരം | തിരുവനന്തപുരത്ത് പാഴ്സല്‍ നല്‍കാനെന്ന വ്യാജേന മുഖംമൂടി ധരിച്ച് വീട്ടിലെത്തിയ യുവതിക്ക് നേരെ വെടിയുതിര്‍ത്ത സംഭവത്തില്‍ വനിത ഡോക്ടര്‍ അറസ്റ്റിലായി.
കൊല്ലം സ്വദേശി ഡോക്ടര്‍ ദീപ്തിയാണ് അറസ്റ്റിലായത്. കൊല്ലത്തെ സ്വകാര്യ ആശുപത്രിയിലെ ഡോക്ടറായ ദീപ്തിയെ ആശുപത്രിയില്‍ നിന്നാണ് പോലീസ് കസ്റ്റഡിയിലെടുത്തത്.

വ്യക്തിവൈരാഗ്യമാണ് ആക്രമണത്തിന് പിന്നിലെന്നാണ് അറിയാന്‍ കഴിയുന്നത്. ദീപ്തിയെ പോലീസ് വിശദമായി ചോദ്യം ചെയ്ത് വരികയാണ്. കഴിഞ്ഞ ഞായറാഴ്ചയാണ് സംഭവം.  എയര്‍ഗണ്‍ ഉപയോഗിച്ചുള്ള ആക്രമണത്തില്‍ വള്ളക്കടവ് സ്വദേശി ഷിനിക്കാണ് കൈയ്ക്ക് പരുക്കേറ്റത്. ആക്രമണത്തിന് ശേഷം പ്രതി ഓടിരക്ഷപ്പെടുകയായിരുന്നു.

നിരീക്ഷണ ക്യാമറയില്‍ നിന്നു ലഭിച്ച ദൃശ്യങ്ങള്‍ പരിശോധിച്ചാണ് ഇവരെ തിരിച്ചറിഞ്ഞത്. എന്നാല്‍ കൃത്യം നടത്താന്‍ എന്താണു കാരണമെന്നു പോലീസ് വെളിപ്പെടുത്തിയിട്ടില്ല.പ്രതിയെ കൃത്യം നടത്താന്‍ ആരെങ്കിലും സഹായിച്ചോ എന്നതുള്‍പ്പെടെയുള്ള കാര്യങ്ങളില്‍ പോലീസ് അന്വേഷണം നടത്തും.

കൈയില്‍ കരുതിയിരുന്ന എയര്‍ഗണ്‍ ഉപയോഗിച്ച് മൂന്ന് തവണയാണ് ഡോക്ടര്‍ വെടിയുതിര്‍ത്തത്. ഇത് തടയാന്‍ ശ്രമിക്കവെയാണ് ഷിനിയുടെ കൈവെള്ളയില്‍ വെടിയേറ്റത്.