പുല്ലേപ്പടി കൊലപാതകം; യുവാവിനെ കൊലപ്പെടുത്തിയത് മോഷണ മുതല്‍ പങ്ക് വെക്കുന്നതിലെ തര്‍ക്കത്തെ തുടര്‍ന്ന്

കൊച്ചി | കൊച്ചി പുല്ലേപ്പടിയില്‍ റെയില്‍വെ ട്രാക്കില്‍ കത്തിക്കരിഞ്ഞ നിലയില്‍ മൃതദേഹം കണ്ടെത്തിയ സംഭവം കൊലപാതകമെന്ന് തെളിഞ്ഞു. സംഭവത്തില്‍ പ്രതി പിടിയിലായി. മാനാശ്ശേരി സ്വദേശി ബിനോയ് ആണ് പിടിയിലായത്. ഇയാളുടെ സുഹൃത്തായ ജോബി ആണ് കൊല്ലപ്പെട്ടത്.

മോഷണ മുതല്‍ പങ്ക് വെക്കുന്നതിനെ തുടര്‍ന്നുള്ള തര്‍ക്കമാണ് കൊലപാതകത്തില്‍ കലാശിച്ചത്.കൊച്ചിയില്‍ പുതുവത്സരരാത്രിയില്‍ നടന്ന സ്വര്‍ണക്കവര്‍ച്ചക്കേസിലെ പ്രതികളാണ് ബിനോയിയും ജോബിയും. എറണാകുളം എളമക്കരയില്‍ വീട് കുത്തിത്തുറന്നാണ് ഇവര്‍ മുപ്പത്തിയേഴ് പവന്‍ സ്വര്‍ണ്ണവും ഒന്നരലക്ഷം രൂപയും കവര്‍ന്നിരുന്നു. ഇന്നലെ റെയില്‍വേ ട്രാക്കില്‍ കത്തിക്കരിഞ്ഞ നിലയിലാണ് ജോബിയുടെ മൃതദേഹം കണ്ടെത്തിയത്.സമീപത്ത് നിന്നും കത്തിക്കാന്‍ ഉപയോഗിച്ച ലൈറ്ററും പെട്രോള്‍ നിറച്ചിരുന്ന കുപ്പിയും കണ്ടെടുത്തിരുന്നു.